Melania Trump është rikthyer në Shtëpinë e Bardhë dhe me këtë rast ka realizuar një set fotografik ekskluziv, duke përfaqësuar rolin e saj si Zonja e Parë e Shteteve të Bashkuara.
Me një stil elegant dhe një qasje më të sigurt, ish-modelja shfaqet në kopertinën e fundit të një reviste të njohur, ndërsa bashkëshorti i saj, Donald Trump, nis mandatin e tij të dytë presidencial.
Që nga largimi nga Shtëpia e Bardhë katër vite më parë, Melania ka qëndruar kryesisht jashtë vëmendjes publike, duke iu përkushtuar familjes dhe djalit të saj, Barron. Por sipas bashkëpunëtorëve të saj të ngushtë, ajo është transformuar ndjeshëm. Stilisti Hervé Pierre, fotografja Regine Mahaux dhe këshilltari i saj i brendshëm Tham Kannalikham theksojnë se vetëbesimi i saj është rritur ndjeshëm, duke reflektuar një Melania më të vendosur dhe të lirshme në mandatin e saj të dytë.
“Ajo ka qenë gjithmonë e përfshirë, por tani ka më shumë liri për t’u shprehur,” shprehet fotografja e saj. “Ndryshe nga tetë vite më parë, ajo është më e sigurt dhe gjithmonë i ka qëndruar besnike vetes. Këtë herë, energjia është ndryshe, pasi Presidenti është rrethuar me një ekip të ri.”
Ekipi i saj e përshkruan si një figurë të fortë, por njëkohësisht të ngrohtë dhe familjare. Pavarësisht detyrimeve të saj publike, Melania ruan një ekuilibër mes rolit të saj si Zonja e Parë dhe përkushtimit ndaj familjes. “Ajo e di gjithmonë ku duhet të jetë,” thotë Mahaux, duke vlerësuar prioritetin që i jep bashkëshortit dhe djalit të saj.
Në mandatin e saj të dytë, ajo synon të vazhdojë me iniciativat që i ka promovuar më parë, përfshirë fushatën kundër bullizmit në internet “Be Best” dhe mbështetjen e fëmijëve në sistemin e kujdestarisë. Përtej imazhit të saj si një grua e distancuar nga jeta e përditshme, njerëzit pranë saj hedhin poshtë këtë perceptim, duke theksuar se ajo mbetet një grua me këmbë në tokë.
“Ajo mund të të bëjë edhe një kafe vetë,” thonë ata, duke sfiduar idenë e një Zonje të Parë që mbështetet vetëm tek shërbimi i të tjerëve. Ky aspekt i personalitetit të saj tregon se, përtej shkëlqimit dhe protokollit, Melania mbetet një figurë me individualitet të qartë dhe një prani të fuqishme në jetën publike dhe familjare.
