Dy anije me emigrantë u fundosën në Mesdhe duke shkaktuar të paktën 27 viktima, ndërsa dhjetëra persona të tjerë vazhdojnë të rezultojnë të zhdukur.
Tragjedia ndodhi të mërkurën, kur dy mjete të mbingarkuara me emigrantë u mbytën pranë brigjeve të Lampedusës. Sipas agjencive humanitare, rreth 60 persona u shpëtuan, por numri i të zhdukurve mbetet i paqartë. Kjo është një tjetër ngjarje e rëndë në këtë zonë, e cila prej kohësh është një nga pikat kryesore të kalimit për migrantët që përpiqen të mbërrijnë në Evropë.
Kryqi i Kuq njoftoi se mes të shpëtuarve janë 56 burra dhe katër gra. Ende nuk dihet numri i saktë i personave që ndodheshin në dy anijet, të cilat u nisën nga Zavija dhe Tripoli në Libi mbrëmjen e së martës.
Mediat italiane raportuan se ndër trupat e parë të sjellë në morgun e Lampedusës ishin ai i një foshnje, tre fëmijëve, dy grave dhe dy burrave. Pamjet nga vendngjarja kanë tronditur opinionin publik dhe kanë nxitur reagime të menjëhershme nga autoritetet.
Kryeministrja Giorgia Meloni e cilësoi ngjarjen si një tragjedi që ngjall “ndjenja të thella tronditjeje” dhe akuzoi trafikantët e qenieve njerëzore për cinizëm në organizimin e udhëtimeve të rrezikshme. Ajo tha se ndërhyrja për shpëtimin nuk mjafton dhe se është e domosdoshme të goditen shkaqet që nxisin emigracionin e paligjshëm.
Edhe zv/kryeministri Matteo Salvini shprehu dhimbjen e tij për humbjen e jetëve, duke theksuar se “përtej keqardhjes dhe lutjeve, është detyrim të luftohen trafikantët e qenieve njerëzore dhe ata që nxisin emigracionin pa kufij”.
Kjo tragjedi rikthen në qendër të vëmendjes çështjen e menaxhimit të flukseve migratore në Mesdhe dhe rrezikun e lartë me të cilin përballen mijëra njerëz që nisen në udhëtime të tilla të dëshpëruara.
