Kylian Mbappé zbret sot sërish në fushë në La Liga, në ndeshjen e fundit të vitit kalendarik përballë Sevillës, një takim që ka një domethënie të veçantë për sulmuesin francez edhe përtej rezultatit sportiv.
Mbappé feston sot 27-vjetorin e lindjes dhe e ka kthyer këtë përballje në një objektiv personal, duke synuar të arrijë, e ndoshta të thyejë, një rekord historik të Cristiano Ronaldos me fanellën e Real Madridit. Gjatë vitit kalendarik 2025, francezi ka realizuar 58 gola, vetëm një më pak se rekordi prej 59 golash që Ronaldo vendosi në vitin 2013.
Ndeshja ndaj Sevillës përfaqëson shansin e fundit për Mbappé që të barazojë ose të kalojë këtë shifër brenda vitit, duke hyrë në histori si lojtari me më shumë gola në një vit kalendarik me fanellën madrilene.
Arritja e këtij rekordi do të kishte edhe një vlerë simbolike për Mbappé, i cili e ka konsideruar Cristiano Ronaldon si idhull dhe frymëzim, ndërsa dëshira për të ndjekur gjurmët e portugezit ka qenë një nga arsyet kryesore që ai ëndërroi prej vitesh veshjen e fanellës së Real Madridit.
Përballja ndaj Sevillës pritet të jetë jo vetëm një ndeshje e rëndësishme për ekipin, por edhe një moment potencialisht historik për yllin francez, i cili synon ta mbyllë vitin me një tjetër rekord të madh në karrierë.
