Shfaqja e mbajtur në teatrin “Bylis” të Fierit, e drejtuar nga Pëllumb Kulla, ka qenë një ngjarje që u mbush me emocione, kujtime dhe ngjallje të artit skenik shqiptar.
Mbrëmja e së mërkurës solli para spektatorëve madhështinë e teatrit shqiptar, përmes emrave të njohur dhe të dashur për publikun, të cilët kanë lënë gjurmë të thella në historinë e këtij teatri. Aktorët si Astrit Hasani, Klajdi Marku dhe Miola Sitaj u shfaqën me performanca të jashtëzakonshme, duke i dhënë jetë kësaj shfaqjeje unike. Pjesa muzikore, këngët dhe vallet u shoqëruan me një dedikim in memoriam për artistët që kanë kaluar nga jeta, duke e bërë këtë mbrëmje të paharrueshme.
Një tjetër element që e ka bërë këtë shfaqje të veçantë ka qenë satira e thellë e Pëllumb Kullës, që ka goditur fenomenet negative që kanë ndodhur në vendin tonë pas viteve 90. Nëpërmjet humorit dhe kritikës tërheqëse, ai ka arritur të përçojë mesazhe të forta për politikanët dhe realitetin shoqëror të sotëm. Kulla ka theksuar se kjo shfaqje rikujton periudhën e lavdishme të teatrit “Bylis”, një periudhë kur ky teatër ishte në majat e artit skenik shqiptar.
Përfundimi i shfaqjes ka qenë i mbushur me emocion, ku Kulla ka kërkuar rikthimin e lavdisë së dikurshme të teatrit dhe ka theksuar rëndësinë e një kulture të pasur artistike, e cila është e nevojshme për shoqërinë e sotme. Një nga momentet më emocionuese ka qenë përshkrimi i aktorit të njohur fierak, Luftar Paja, i cili me lot në sy ka theksuar se Pëllumb Kulla vazhdon të jetë një shkollë e vërtetë e artit shqiptar, dhe se ai është një fat i madh për Fierin.
Në fjalët e udhëheqësit ekzekutiv të shfaqjes, Leonard Bombaj, shfaqja është përshkruar si një mundësi e madhe për të mësuar dhe për të rritur vlerat e artit skenik shqiptar. Ai ka shprehur kënaqësinë që ishte pjesë e këtij projekti dhe ka theksuar se shfaqja i ka dhënë mundësi shumë të vlefshme për zhvillimin e tij si profesionist.
Ndërsa, nën udhëheqjen artistike të Gëzim Kames, publiku artdashës fierak ka përjetuar një natë të paharrueshme. Ansambli artistik i kësaj shfaqjeje ka rikthyer memorien e një periudhe të artë teatrore, ku Pëllumb Kulla ishte në krye të skenës së Fierit.
