Lushnja u përball me Besën e Kavajës në javën e 5-të të fazës së dytë të kampionatit, në një ndeshje të zhvilluar në stadiumin “Roza Haxhiu”. Sfida përfundoi 0-1 në favor të miqve, të cilët shënuan golin e vetëm të takimit në minutën e 38-të, pas një penalltie të realizuar nga Rodrigo Migone.
Pjesa e dytë solli më shumë presion nga Lushnja, që kërkoi me këmbëngulje barazimin, por nuk arriti të dërgojë topin në rrjetë. Loja u shoqërua me ndërprerje të shumta, faulla dhe tension, me disa kartonë të verdhë ndaj lojtarëve lushnjarë, ndërsa arbitri u vendos shpesh në qendër të polemikave.
Në përfundim të ndeshjes, trajneri Ditmar Bicaj dha një deklaratë për TV Apollon dhe gazetarin Ndriçim Gjoshi, ku analizoi paraqitjen e ekipit dhe shprehu pakënaqësi për disa nga vendimet arbitrare.
