106 vjet histori shtetformuese

Sot përkujtohet nisja e punimeve, 106 vite më parë, e Kongresit të Lushnjës – një nga ngjarjet më të rëndësishme të historisë kombëtare shqiptare. Kjo ngjarje shënoi një kthesë vendimtare për forcimin e shtetit shqiptar dhe vendosjen e themeleve të institucioneve shtetformuese të vendit.

Kongresi i Lushnjës, i mbajtur në janar të vitit 1920, i dha fund paqartësive politike të kohës dhe riafirmoi pavarësinë e Shqipërisë në një moment kritik për ekzistencën e saj. Vendimet e marra në këtë kongres hodhën bazat e një qeverisjeje të qëndrueshme dhe përcaktuan Tiranën si kryeqytet të vendit. Përfaqësues nga të gjitha trevat shqiptare u mblodhën në Lushnjë, duke dëshmuar vullnetin për unitet dhe vetëvendosje.

Në këtë ngjarje historike u dalluan figura të shquara të jetës politike dhe kombëtare shqiptare. Kryetar i punimeve të Kongresit ishte Aqif Pasha Elbasani, ndërsa Sulejman Delvina u zgjodh Kryeministër i Qeverisë së dalë nga Kongresi, duke marrë përsipër drejtimin e shtetit në një periudhë tepër të vështirë. Ndër personalitetet e rëndësishme që kontribuuan në vendimet madhore të Kongresit ishin Luigj Gurakuqi, Mehmet Konica, Eshref Frashëri dhe Abdi Toptani, të cilët mbrojtën me vendosmëri pavarësinë dhe sovranitetin e Shqipërisë.

Sot, kjo ngjarje përkujtohet jo vetëm si një kapitull i lavdishëm i historisë, por edhe si një frymë që vijon të frymëzojë brezat për përgjegjësi qytetare dhe atdhedashuri. Lushnja nderohet si qyteti që priti një nga momentet më vendimtare për fatet e shtetit shqiptar, duke mbetur simbol i unitetit kombëtar dhe i qëndresës politike.

Këto pamje vijnë enkas tv Apollon në këtë 21 janar 2026, në 106-vjetorin e Kongresit Kombëtar, i cili u zhvillua në qytetin e Lushnjës në vitin 1920.