Policia Bashkiake, e mbështetur nga stafi i Bashkisë, nisi sot pastrimin e trotuareve, duke rikthyer hapësirat publike për këmbësorët e Lushnjes.
Aksioni i shumëpritur për çlirimin e trotuareve në Lushnje startoi sot herët, siç kishin paralajmëruar strukturat bashkiake. Punonjësit e Policisë Bashkiake dhe të Drejtorisë së Shërbimeve angazhuan mjetet për të liruar segmentin kryesor që lidh lagjet me qendrën.
Më herët, kryebashkiakja Eriselda Sefa i kishte bërë thirrje bizneseve të qëndronin në anën e ligjit. “Lironi hapësirat ose do të përballeni me forcën e ligjit”, paralajmëroi ajo një ditë para afatit pesëditor, raporton gazetari Ndriçim Gjoshi.
Shumë subjekte reaguan menjëherë, hoqën podet dhe skeletet metalike para dyqaneve. Punonjësit zbrazën trotuaret dhe kalimtarët rifituan rrugën e tyre pa pengesa.
Për bizneset që zgjodhën të injorojnë afatin, punonjësit hoqën çdo element të lënë pas. Ekipet grumbulluan materialet dhe zona mori pamjen e dikurshme, ndërsa kalimi u bë i sigurt.
Plani i Bashkisë parashikon zgjerimin e fushatës edhe në pedonale, hapësirat e gjelbra dhe rrugët kryesore. Çdo shkelës do të gjobitet pa përjashtim dhe monitorimi do të vijojë gjatë gjithë verës.
Qytetarët e përshëndetën vendimin dhe theksuan se këmbësorët rifituan trotuaret. “Shpresojmë që aksioni të mos mbetet i izoluar”, tha një banor, ndërsa të tjerë kërkuan zgjerim në çdo hapësirë publike të qytetit.
