Përfaqësuesja shqiptare është në qendër të një loje strategjike për renditjen në vazot e “play-off”-it, ku çdo pikë dhe rezultat nga ndeshjet e tjera mund të përcaktojë rivalët e saj të ardhshëm.
Në prag të përfundimit të fazës kualifikuese për Botërorin, “lufta” nuk kufizohet më vetëm në sigurimin e vendit të dytë në grup. Shqipëria dhe kombëtaret e tjera që ndodhen në garë po luftojnë për të siguruar një pozicion sa më të favorshëm në ndarjen e vazove, që përcakton edhe kundërshtarët në gjysmëfinalet e “play-off”-it. Rënditja përfundimtare e FIFA-s pas ndeshjeve të nëntorit do të jetë vendimtare.
Sllovakia është një nga kombëtaret që po bën tifo për Shqipërinë. Arsyeja lidhet me mënyrën se si formohen vazot në bazë të renditjes FIFA. Sllovakia nuk dëshiron që Serbia ta mbyllë si e dyta në Grupin K, pasi kjo do ta zhvendoste vetë në vazon e tretë. Në të kundërt, nëse Shqipëria mban formën aktuale dhe Irlanda e Veriut arrin vendin e dytë në Grupin A, ku është edhe Sllovakia, kuqezinjtë mund të përfitojnë duke kaluar në vazon e dytë.
Aktualisht, Sllovakia ndodhet në vazon e dytë, ndërsa Shqipëria në të tretën. Për kuqezinjtë, ky ndryshim do të ishte me shumë rëndësi, pasi vazoja e dytë do t’u jepte një kundërshtar më të lehtë në letër në fazën gjysmëfinale të “play-off”-it. Kjo do të përkthente shanse më të mëdha për kualifikim në Botërorin e ardhshëm.
Nëse situata në grupet e tjera mbetet e pandryshuar, dhe njëkohësisht Shqipëria dhe Irlanda e Veriut përfundojnë si të dytat në grupet e tyre, atëherë përfaqësuesja jonë do të ngjitej automatikisht në vazon e dytë. Ky skenar mbështetet në renditjen aktuale të FIFA-s, ku ekipet si Hungaria, Skocia, Çekia dhe Sllovakia mbajnë pozita më të larta.
Tabela momentale e “play-off”-it pas raundit të 8-të paraqitet kështu:
Vazo 1: Itali, Turqi, Ukrainë, Poloni
Vazo 2: Hungari, Skoci, Çeki, Sllovaki
Vazo 3: Shqipëri, Maqedoni e Veriut, Bosnjë-Hercegovinë, Kosovë
Vazo 4: Uells, Rumani, Suedi, Irlandë e Veriut
Në përfundim, fati i Shqipërisë në “play-off” nuk do të varet vetëm nga rezultatet e saj, por edhe nga kombinimet e ndeshjeve në grupet e tjera. Një renditje më e mirë në FIFA mund të sjellë jo vetëm prestigj, por edhe rrugën më të lehtë drejt ëndrrës së madhe — pjesëmarrjes historike në Botërorin e ardhshëm.
