Biblioteka e qytetit të Lushnjes u pasurua me libra të rinj falë dhurimit të organizatës Internacional Book Project dhe kontributit të William Farber.
Në një atmosferë të ngrohtë dhe të mbushur me dashuri për dijen, qyteti i Lushnjes priti një nismë të veçantë kulturore këtë të martë. Organizata Internacional Book Project, në bashkëpunim me donatorin William Farber, dhuroi një sasi të konsiderueshme librash për bibliotekën e qytetit. Ky veprim simbolik solli jo vetëm tituj të rinj për lexuesit, por edhe një frymë të re në komunitetin lokal, raporton gazetari Ndriçim Gjoshi.
Ceremonia e dorëzimit të librave u zhvillua në ambientet e bibliotekës, në prani të kryetares së bashkisë, znj. Eriselda Sefa, e cila vlerësoi këtë dhurim si një gjest modest në pamje të parë, por me një peshë të madhe shpirtërore dhe kulturore për qytetin. Ajo theksoi rëndësinë e mbështetjes institucionale për çdo nismë që i shton vlerë fondit të librave dhe që kontribuon në pasurimin shpirtëror të komunitetit.
Sipas znj. Sefa, një libër nuk është vetëm një koleksion faqesh me fjalë, por një udhëtim i pafund drejt dijes, një dritare për të ardhmen dhe një ëndërr që ndizet në duart e çdo lexuesi që rritet me librin. Ajo premtoi mbështetje për çdo projekt që synon të ngrejë nivelin kulturor dhe edukativ të qytetit.
Aktiviteti u përshkua nga emocione të forta dhe frymëzim, ndërsa të pranishmit vlerësuan rëndësinë e librit si një element thelbësor për zhvillimin personal dhe shoqëror. Donacioni u përshëndet edhe nga përfaqësues të institucioneve lokale dhe aktivistë të fushës së arsimit dhe kulturës.
Falënderime të veçanta iu drejtuan organizatorëve dhe mbështetësve që bënë të mundur këtë dhurim, duke e sjellë fjalën e shkruar më pranë komunitetit. Ky bashkëpunim është një shembull pozitiv i lidhjes mes qytetarisë globale dhe nevojës për më shumë dije në çdo cep të vendit.
Kjo nismë e veçantë rikujton se kur dhurohet një libër, ndizet një dritë e re – jo vetëm në raftet e bibliotekës, por në zemrën dhe mendjen e çdo lexuesi.
