Ylli i ri Lamine Jamal përballet me momente të vështira te Barcelona, ndërsa një ofertë rekord nga Arabia mund të ndryshojë të ardhmen e tij futbollistike.
Lamine Jamal, një nga talentet më të spikatura të Barcelonës, po kalon një periudhë të ndërlikuar në aspektin sportiv. Pas disa ndeshjeve jo shumë bindëse në fillim të sezonit, ai është bërë objekt kritikash, veçanërisht për ndikimin që jeta jashtë fushës duket se po ka në performancën e tij. Disa zëra në Spanjë thonë se fokusi i Jamal është shpërndarë, duke ndikuar drejtpërdrejt në kontributin e tij për skuadrën.
Klubi katalanas, megjithatë, nuk kishte menduar ta shiste lojtarin, i cili është i lidhur me kontratë deri në vitin 2031. Marrëveshja e tij aktuale parashikon një pagë prej 10 milionë eurosh në vit, krahas një bonusi total prej 25 milionë eurosh që shpërndahet në vite. Kjo tregon se Barcelona e sheh 17-vjeçarin si pjesë kyçe të projektit afatgjatë.
Por jo të gjithë mendojnë se ai do të qëndrojë kaq gjatë në “Camp Nou”. Sipas mediave spanjolle, skuadra e pasur saudite Al Hilal është gati të hyjë fuqishëm në garë për të siguruar firmën e lojtarit. Burime pranë klubit tregojnë se është dërguar një sinjal zyrtar në drejtim të Barcelonës për një ofertë që mund të ndryshojë çdo ekuacion.
Oferta e Al Hilal parashikohet të jetë rekord, me një vlerë që mund të arrijë deri në 400 milionë euro – një shumë që do të zgjidhte jo pak nga problemet financiare që po rëndojnë mbi klubin katalanas. Për Jamal, kjo do të përkthehej në një rrogë shumë më të lartë sesa ajo që përfiton aktualisht, duke e bërë tundimin ekonomik të vështirë për t’u refuzuar.
Megjithatë, dilemat janë të mëdha. Barcelona nuk dëshiron të humbasë një nga xhevahirët më të çmuar të akademisë së saj, ndërsa lojtari vetë ndodhet në një periudhë reflektimi. Marrëdhëniet e tensionuara me trajnerin Flik, të raportuara së fundmi, vetëm sa kanë shtuar pasigurinë për të ardhmen e tij.
Nëse situata mes tij dhe stafit teknik nuk qetësohet, verës që vjen mund të shohim një prej transferimeve më të bujshme të dekadës. Për momentin, e vetmja gjë e sigurt është se e ardhmja e Lamine Jamal mbetet në qendër të vëmendjes së botës së futbollit.
