Një çift lejlekësh ka ndërtuar folenë në hyrje të Kuçovës, duke jetuar çdo vit mes njerëzve dhe fushave të qytetit të naftëtarëve
Prej vitesh, hyrja e qytetit të Kuçovës është bërë strehë për një çift lejlekësh që rikthehen çdo sezon për të jetuar mes njerëzve. Këta zogj të bardhë me krahë të zinj kanë zgjedhur majën e një shtylle të tensionit të lartë për të ndërtuar folenë e tyre.
Pamjet që vijnë nga Kuçova janë bërë tashmë të zakonshme për banorët, por magjepsëse për çdo vizitor që ndalet t’i sodisë. Çifti i lejlekëve fluturon mbi fushat e gjelbra dhe kodrat përreth qytetit, në kërkim të ushqimit që më pas e çojnë në folenë e ngritur mbi kabllot e energjisë, raporton gazetari Ndriçim Gjoshi.
Çdo vit, ata rrisin aty zogjtë e tyre të sapolindur, duke i prezantuar me ambientin e qytetit dhe duke u kthyer në një simbol të harmonisë mes natyrës dhe jetës urbane. Foleja e tyre mbi shtyllë është kthyer në pikë referimi për kalimtarët dhe fotografët amatorë që ndalojnë për të fiksuar këtë spektakël natyror.
Lejleku, në traditën shqiptare dhe më gjerë, konsiderohet një shpend fatsjellës. Prania e tij pranë shtëpive apo në zonat e banuara shihet si ogur i mirë, dhe në Kuçovë ky besim duket se është bërë realitet.
Zogjtë që lindin në këtë fole, me fluturimin e tyre të parë, përshkojnë qiellin e Kuçovës duke zgjedhur të mbeten pjesë e qytetit që i ka mikpritur. Në këtë mënyrë, brezat e rinj të lejlekëve vazhdojnë ciklin e jetës në një ndërthurje të rrallë mes betonit dhe natyrës.
Ky fenomen i rrallë është kthyer në një atraksion të vogël turistik për qytetin, që përveç historisë industriale, ofron edhe pamje unike të bashkëjetesës së kafshëve të egra me jetën urbane. Lejlekët nuk janë më thjesht vizitorë, ata janë bërë pjesë e identitetit të Kuçovës.
