Ministri i Jashtëm rus Sergei Lavrov paralajmëroi se çdo agresion ndaj Rusisë do të marrë përgjigje të vendosur, ndërsa rriten shqetësimet për fluturimet e dronëve në Europë.
Duke folur në Asamblenë e Përgjithshme të OKB-së, Sergei Lavrov u shpreh se Rusia nuk ka pasur kurrë qëllime për të sulmuar NATO-n ose Bashkimin Evropian. Megjithatë, ai paralajmëroi se çdo agresion kundër vendit të tij do të përballet me reagim të menjëhershëm dhe vendimtar.
Lavrov hodhi poshtë akuzat se Moska po planifikon një sulm ndaj Aleancës së Atlantikut të Veriut, duke i cilësuar ato si provokime të vazhdueshme të Perëndimit. “Nuk duhet të ketë asnjë dyshim se Rusia do të përgjigjet nëse vendi ynë kërcënohet”, theksoi ai në fjalimin e tij.
Këto deklarata vijnë në një moment kur vendet evropiane po shfaqin alarm të shtuar për praninë e dronëve të paidentifikuar mbi bazat ushtarake. Sipas raportimeve të Guardian, të premten në mbrëmje disa dronë u panë mbi instalime ushtarake në Danimarkë, përfshirë Karupin, bazën më të madhe ajrore të vendit.
Norvegjia ka nisur hetime pas raportimeve për probleme të ngjashme mbi bazën e saj më të madhe ushtarake në Orland, ku stacionohen avionët modernë F-35. Në të njëjtën kohë, media ukrainase NEXTA raportoi se disa dronë u vunë re edhe mbi bazat kryesore të NATO-s në territorin norvegjez.
Gjermania ka raportuar gjithashtu raste të shumta të shfaqjes së dronëve në ditët e fundit, përfshirë mbylljen e përkohshme të disa aeroporteve. Berlini ka reaguar me plane konkrete për të forcuar mbrojtjen kundër dronëve dhe po shqyrton ligjërisht lejimin e ushtrisë për t’i rrëzuar në raste kërcënimi serioz.
Sipas gazetës gjermane Bild, autoritetet ushtarake do të kenë kompetencën të ndërhyjnë nëse një dron paraqet rrezik për jetën e qytetarëve apo për infrastrukturën kritike. Vendimi final për këtë masë pritet të merret nga Ministria Gjermane e Mbrojtjes, ndërsa tensionet mes Rusisë dhe Perëndimit vazhdojnë të përshkallëzohen.
Ky zhvillim e shton edhe më shumë klimën e pasigurisë në Europë, ku rritja e numrit të fluturimeve të dyshimta shihet si një sinjal paralajmërues për përshkallëzime të mëtejshme.
