Ish-Sekretari i Thesarit të Shteteve të Bashkuara, Larry Summers, do të japë dorëheqjen nga posti i profesorit në Universitetin e Harvardit në fund të vitit akademik, pas polemikave që lidhen me komunikimet e tij me Jeffrey Epstein.

Vendimi u konfirmua nga zëdhënësi i universitetit, Jason Newton, i cili bëri të ditur se, në kuadër të shqyrtimit të vazhdueshëm të dokumenteve të publikuara nga qeveria amerikane mbi rastin Epstein, presidenti i Harvardit pranoi dorëheqjen e Summers.

Dokumentet e bëra publike përfshinin komunikime personale midis Summers dhe Epstein, por nuk tregonin për ndonjë shkelje nga ana e tij.

Summers shërbeu si Sekretar i Thesarit gjatë administratës së Presidentit Bill Clinton dhe më pas si president i Harvardit në fillim të viteve 2000. Në nëntor ai kishte njoftuar se do të tërhiqej nga jeta publike, por se do të mbante pozicionin akademik në universitet.

Ai gjithashtu dha dorëheqjen nga bordi i OpenAI dhe mori pushim nga pozicioni i dekanit në shkollën e biznesit dhe qeverisjes së universitetit.

Në reagimin e tij të mëparshëm, Summers ishte shprehur se ishte “thellësisht i turpëruar” për veprimet e tij dhe se do të tërhiqej nga detyrat për të riparuar marrëdhëniet me familjen.