Ish-kryeministri Fatos Nano ka ndërruar jetë në moshën 73-vjeçare, pas një periudhe të gjatë përballjeje me probleme shëndetësore, duke lënë pas një trashëgimi të rëndësishme në historinë politike të Shqipërisë.
Lajmi për ndarjen nga jeta të Fatos Nanos, një prej figurave më të njohura të tranzicionit politik shqiptar, ka sjellë reagime dhe kujtime të shumta në skenën publike. Nano ndërroi jetë në moshën 73-vjeçare, pasi prej disa javësh ndodhej në gjendje të rënduar shëndetësore në një spital privat.
Prej vitesh, ish-kryeministri përballej me komplikacione shëndetësore, por këtë herë trupi i tij nuk arriti t’i rezistonte sëmundjes. Largohet kështu nga jeta një prej protagonistëve kryesorë të politikës së pas viteve ’90.
Fatos Nano u tërhoq nga politika aktive në vitin 2005, pas një karriere të gjerë që la gjurmë të thella si brenda Partisë Socialiste, ashtu edhe në qeverisjen e vendit. Figura e tij shpesh është shoqëruar nga debate, përplasjesh politike dhe momente të rëndësishme vendimtare për rrugëtimin e Shqipërisë drejt demokracisë.
Karriera e tij politike nisi zyrtarisht më 1991, kur Nano u vendos në krye të qeverisë tranzitore që kishte detyrë të organizonte zgjedhjet e para demokratike në vend. Ai udhëhoqi vendin drejt një sistemi të ri politik dhe ekonomik pas shembjes së regjimit komunist.
Në zgjedhjet e 31 marsit 1991, Partia Socialiste siguroi shumicën, dhe Nano u rizgjodh kryeministër. Megjithatë, vetëm dy muaj më vonë ai dha dorëheqjen, në një periudhë të trazuar politike dhe sociale.
Po në atë vit, ai mori drejtimin e Partisë Socialiste, duke e shndërruar atë në partinë kryesore të së majtës moderne shqiptare. Nën drejtimin e tij, PS filloi procesin e distancimit gradual nga trashëgimia e Partisë së Punës dhe përqasjen drejt modeleve europiane.
Në vitin 1992, pas fitores së Partisë Demokratike në zgjedhje, Nano u përball me akuzat për korrupsion dhe abuzim detyre. Ai u burgos një vit më vonë, çka solli një periudhë të gjatë përplasjesh politike dhe ndërkombëtare në lidhje me çështjen e tij.
Megjithëse për shumëkënd ai mbetet një figurë komplekse, e ndarë mes admirimit dhe kritikës, ndikimi i tij në formësimin e realitetit politik të Shqipërisë është i pamohueshëm. Ai përfaqësonte një epokë ku vendi kërkonte të ndërtonte identitetin e tij demokratik pas një diktature të gjatë.
Sot, me largimin e tij nga jeta, mbyllet një kapitull i rëndësishëm i historisë politike shqiptare, ndërsa debati për rolin, ndikimin dhe trashëgiminë e tij do të mbetet i gjallë për shumë kohë.
