Një prej lagjeve më të mëdha të fshatit Qerret i Vjetër ka mbetur për dekada të tëra e braktisur, pa u marrë vesh asnjë projekt rinovimi apo përmirësimi nga autoritetet.
Rruga që kalon nëpër këtë lagje është më pak se 700 metra e gjatë dhe ndodhet në një gjendje të mjerueshme. Banorët, me mundin e tyre dhe shpenzime të veta, përpiqen ta mbajnë atë në përdorim, por stina e reshjeve ka bërë që kjo situatë të bëhet akoma më e vështirë, raporton gazetarja Mukades Dervishi.
Fëmijët që luajnë në këtë rrugë janë të detyruar të kalojnë nëpër baltë dhe të përballen me kushte të rënda për të shijuar një moment argëtimi.
Përveç rrugës, një tjetër problem shqetësues për banorët është edhe infrastruktura e energjisë elektrike. Linjat e energjisë, të cilat datojnë nga periudha para viteve ’90, nuk janë përmirësuar që prej asaj kohe. Banorët kanë marrë iniciativën vetë dhe kanë vendosur shtylla hekuri për të mbajtur kabllot, por kjo nuk mjafton për të garantuar një furnizim të qëndrueshëm me energji. Tensioni i ulët është një tjetër problem që shqetëson ata, pasi shpesh ndodhin prishje të pajisjeve elektroshtëpiake.
Në këtë situatë, të vetmet që kanë guxuar të flasin dhe të shprehin shqetësimet janë gratë e lagjes. Ato janë më të prekurat nga kjo gjendje, pasi përballen çdo ditë me vështirësitë e jetesës dhe mungesën e kushteve elementare. Burrat e lagjes, ndryshe nga gratë, shpeshherë janë të kapur nga strukturat shtetërore dhe nuk kanë mundësinë të flasin për problemet që po kalojnë.
Banorët e Qerretit të Vjetër kërkojnë që institucionet shtetërore të marrin masa për të përmirësuar kushtet e jetesës në këtë lagje. Ata kërkojnë jo vetëm riparimin e rrugës dhe përmirësimin e infrastrukturës elektrike, por edhe mbështetje për të krijuar kushte më të mira për fëmijët që jetojnë aty. Kjo lagje ka nevojë urgjente për investime dhe një vëmendje më të madhe nga autoritetet që të mos mbetet më në harresë.
Të gjithë ata që jetojnë në këtë lagje e dinë se koha po kalon dhe kërkojnë ndryshime, por gjithashtu janë të vetëdijshëm se pa një angazhim të fortë nga qeveria dhe bashkia, situata do të mbetet e pandryshuar. Ata presin që problemet e tyre të zgjidhen dhe të mund të shijojnë kushte jetese më të mira për veten dhe për brezat që do të vijnë.
