Pas dekadash konflikti dhe mbi 40 mijë viktimash, PKK dorëzon armët, duke hapur rrugën për një epokë të re paqeje në Turqi
Pas më shumë se katër dekadash lufte të përgjakshme, një kapitull i errët në historinë e Turqisë dhe Kurdëve duket se po mbyllet. Tridhjetë militantë të Partisë së Punëtorëve të Kurdistanit (PKK) dogjën publikisht armët e tyre në veri të Irakut, duke sinjalizuar çarmatosjen e parë simbolike të këtij grupi që prej vitit 1984.
Ky veprim u përshëndet menjëherë nga presidenti turk, Recep Tayyip Erdogan, i cili deklaroi se Turqia po hyn në një epokë të re. “Një plagë shumëvjeçare e terrorizmit është drejt shërimit. Sot kemi hapur një faqe të re në historinë tonë,” tha ai nga Ankaraja, para anëtarëve të Partisë për Drejtësi dhe Zhvillim.
Presidenti theksoi se procesi i çarmatosjes kërkon konsensus të gjerë dhe shtoi se parlamenti duhet të marrë një rol udhëheqës në krijimin e kuadrit ligjor që do të garantojë një tranzicion të qetë dhe të qëndrueshëm për militantët që lënë armët.
Ankaraja ndërkohë ka ndërmarrë nisma për ngritjen e një komisioni parlamentar i cili do të mbikëqyrë të gjithë procesin e kalimit nga veprimtaria e armatosur në një pjesëmarrje potenciale në politikën demokratike.
Vendimi për çarmatosje dhe shpërbërje i PKK-së erdhi pas një thirrjeje të drejtpërdrejtë nga lideri i saj historik, Abdullah Ocalan, i cili ndodhet në burg që prej më shumë se dy dekadash. Kjo thirrje duket se ka dhënë frytet e para, duke ringjallur shpresat për paqe.
Pavarësisht përpjekjeve të dështuara në të kaluarën, ky zhvillim i fundit shihet si një nga iniciativat më serioze për t’i dhënë fund një konflikti që ka marrë jetën e mbi 40 mijë njerëzve dhe ka lënë pasoja të thella ekonomike, sociale dhe politike në të gjithë rajonin.
A do të jetë kjo fundi përfundimtar i një konflikti kaq të gjatë dhe kompleks? Koha do ta tregojë. Por për momentin, zërat e armëve duket se po zëvendësohen nga fjalët e paqes.
