Qeveria e Kubës ka deklaruar se 32 shtetas kubanë kanë humbur jetën gjatë operacionit ushtarak të Shteteve të Bashkuara në Venezuelë, i cili kishte si objektiv kapjen e presidentit Nicolás Maduro.

Sipas autoriteteve kubane, viktimat ishin anëtarë të forcave të armatosura dhe shërbimeve të inteligjencës së Kubës, të cilët u vranë gjatë asaj që u cilësua si “aksione luftarake”. Për këtë arsye, Kuba ka shpallur dy ditë zie kombëtare.

Forcat e Armatosura Kubane bënë me dije se shtetasit kubanë “ranë pas rezistence të ashpër, në përballje të drejtpërdrejtë me sulmuesit ose si pasojë e bombardimeve ndaj instalimeve ushtarake”.

Operacioni amerikan përfshiu një seri sulmesh ajrore ndaj objektivave në Venezuelë, ndërkohë që një njësi elitare ushtarake avancoi drejt kompleksit ku ndodhej presidenti venezuelian.

Kuba është një aleate e hershme e Venezuelës dhe, prej vitesh, ka ofruar mbështetje të drejtpërdrejtë për qeverinë e Nicolás Maduro, përfshirë sigurimin personal të tij dhe praninë e personelit kuban në struktura të ndryshme të ushtrisë venezueliane.