Seanca paraprake në procesin ndaj Monika Kryemadhit dhe të pandehurve të tjerë është shoqëruar me tone ironike nga ish-deputetja, e cila kundërshtoi akuzat e SPAK-ut.

Gjatë fjalës së saj, Kryemadhi ironizoi pretendimet e prokurorisë, duke deklaruar: “Kur ju pretendoni që babai im ka falsifikuar dokumentet e banesës, unë dilja në protestë për të liruar Fatos Nanon dhe më pas dashuroja Ilir Metën”.

Ajo hodhi poshtë ekspertizën financiare të Prokurorisë së Posaçme lidhur me të ardhurat e saj dhe të Ilir Metës, duke kërkuar riekspertim financiar.

Kryemadhi kërkoi gjithashtu rikthimin e telefonit të sekuestruar, duke pretenduar se është marrë në kundërshtim me procedurën, pasi në atë kohë ishte deputete. Gjykata pranoi këtë kërkesë.

Sa i përket kërkesave për rikthimin e çështjes për hetime të mëtejshme, përfshirë marrjen në pyetje të Ardian Shatkut dhe përfaqësuesve të GSI, vendimi do të shpallet më 5 mars.

Në seancë, Kryemadhi kërkoi gjithashtu që të hapen mesazhet dhe komunikimet me Edi Ramën për ligjin e minierave.

Edhe Ilir Meta, i cili kishte paraqitur më herët qëndrimin e tij, ka pretenduar se hetimi është i motivuar politikisht. “Unë jam këtu për shkaqe politike”, është shprehur Meta, ndërsa përfaqësuesi i tij ligjor theksoi se në dosje nuk ka dokument të firmosur nga ai.

Gjatë ditës u dëgjuan edhe parashtrimet e Pirro Xhixhos, Ema Çokut dhe Fatime Kryemadhit. Më herët, SPAK ka kërkuar kalimin për gjykim për akuzat e korrupsionit dhe pastrimit të parave.