Në fshatin Çermë Sektor, në bashkinë Divjakë, kinemaja e ndërtuar në vitet 1960-1962, gjatë periudhës së sistemit komunist, ka rënë në harresë dhe është shndërruar në një gërmadhë.
Kjo ndërtese, e dikurshme qendër kulture, tani është e mbushur me mbeturina dhe bimë të egra që kanë mbuluar çdo cep të saj.
Arkitektura e saj, që përfaqëson stilin e thjeshtë të asaj kohe, është një pjesë e trashëgimisë kulturore të vitit 1960. Fasada e jashtme e kinemasë është e thjeshtë, por ende ruan elemente të stilit të modernizimit që karakterizonte ndërtimet e periudhës komuniste.
Ndërsa futesh brenda, ndjesia e periudhës së komunizmit është e dukshme. Pa dyer, pa dritare dhe pa çati, kinemaja ka humbur çdo shenjë të dikurshmës. Gjendja e brendshme është plotësisht e shkatërruar dhe çdo element i saj është kthyer në rrënoja të plota.
Ky vend, dikur një qendër aktiviteti dhe argëtimi për komunitetin, tani është një kujtesë e zymtë e kaluara. Pamja e brendshme është kaq e shkatërruar sa është e vështirë të imagjinohet si ishte dikur, ndërsa çdo shenjë e historisë së saj është mbuluar nga harresa dhe moskujdesi.
Për shumicën e banorëve të zonës, kinemaja është bërë një simbol i lënë pas dore, një dëshmi e rënies së institucioneve kulturore të periudhës komuniste. Ajo që dikur mund të ketë qenë një vend takimi dhe shprese për shumë, tani është një shesh i mbushur me mbeturina.
Me kalimin e kohës, ky objekt i trashëgimisë mund të shërbejë si një mundësi për restaurim dhe rehabilitim, që do t’i jepte një shpëtim jo vetëm këtij vendi të shkatërruar, por edhe identitetit kulturor të zonës.
