Milorad Dodik refuzon të largohet nga posti i presidentit të Republika Srpska, duke e futur Bosnjën në krizë të thellë kushtetuese dhe tensione politike të rrezikshme.
Më 18 gusht 2025, Gjykata Supreme e Bosnjë-Hercegovinës rrëzoi ankesën e Milorad Dodikut kundër vendimit të Komisionit Shtetëror të Zgjedhjeve për t’i revokuar mandatin dhe për t’ia ndaluar aktivitetin politik për gjashtë vite. Vendimi shënon fundin e një procesi dyvjeçar, por zbatimi i tij po shoqërohet me rezistencë të ashpër.
Dodik ka deklaruar publikisht se nuk do të pranojë shkarkimin, duke e konsideruar vendimin si sulm ndaj “vullnetit të popullit serb”. Ai insistoi se mbetet president i Republika Srpska dhe akuzoi institucionet ndërkombëtare për ndërhyrje në punët e brendshme. Kjo retorikë ka shtuar frikën për një përshkallëzim politik dhe institucional në vend.
Komisioni Qendror i Zgjedhjeve pritet të shpallë zgjedhje të parakohshme presidenciale, por udhëheqja e RS-së në Banja Luka ka paralajmëruar se do t’i pengojë ato, madje duke përdorur forcën policore. Një veprim i tillë mund të përkeqësojë marrëdhëniet mes boshnjakëve, kroatëve dhe serbëve, duke ringjallur tensionet historike të pasluftës së viteve ’90.
Ndërkohë, Ministri i Jashtëm Elmedin Konakoviq ka nisur procedurat për t’i hequr Dodikut pasaportën diplomatike. Paralelisht, Asambleja Kombëtare e RS po shqyrton mundësinë e një referendumi mbi pavarësinë – një veprim që do të hapte përplasje të reja ligjore dhe politike me qeverinë qendrore.
Opozita në RS është e ndarë përballë kësaj krize. Një pjesë e saj e kundërshton vendimin e gjykatës dhe zgjedhjet e reja, duke mbajtur një qëndrim të ngjashëm me Dodikun, ndërsa forca të tjera politike e akuzojnë përçarjen si strategji të orkestruar nga Beogradi për të ruajtur kontrollin mbi entitetin serb.
Reagimet ndërkombëtare janë të ndara. Hungaria dhe Rusia i kanë dalë në krah Dodikut, duke e cilësuar vendimin e gjykatës si politik dhe të diktuar nga Brukseli. Nga ana tjetër, Kroacia i ka kërkuar atij të respektojë vendimin dhe të shmangë destabilizimin e Bosnjës.
Rasti Dodik nuk është i pari i këtij lloji. Në vitin 1999, një vendim i ngjashëm preku presidentin e atëhershëm të RS-së, Nikola Poplashen, ndërsa kryeministër në atë kohë ishte vetë Milorad Dodik, i cili atëherë e mbështeti shkarkimin – një ironi historike që sot po e rikthen vendin në një spirale tensioni.
