Në kuadër të përgatitjeve për zgjedhjet për Kuvendin e Kosovës, Prokurori i Shtetit ka njoftuar se janë angazhuar rreth 100 prokurorë dhe një numër i konsiderueshëm i personelit të sistemit prokurorial, të cilët do të qëndrojnë në detyrë deri në përfundim të procesit zgjedhor.
Ky angazhim ka për qëllim monitorimin dhe reagimin ndaj çdo parregullësie që mund të ndodhë gjatë zgjedhjeve të këtij viti.
Prokurorët do të jenë të pranishëm në zyrat e tyre në qytetet ku ekzistojnë prokuroritë themelore, ndërsa në ato vende ku nuk ka prokurori, ata do të qëndrojnë në stacione policore. Bashkëpunimi me hetuesit e Policisë së Kosovës do të jetë kyç për mbrojtjen e votës së lirë të qytetarëve, duke siguruar që procesi zgjedhor të zhvillohet në mënyrë të drejtë dhe pa manipuleime.
Koordinatorja kombëtare për zgjedhjet, prokurorja Laura Pula, ka marrë përsipër mbikëqyrjen e zbatimit të detyrave të koordinatorëve rajonalë dhe prokurorëve të angazhuar, si dhe prokurores kujdestare në Komisionin Qendror të Zgjedhjeve (KQZ). Kjo strukturë është e fokusuar për të siguruar që çdo fazë e procesit zgjedhor të jetë e mbikëqyrur dhe çdo ndodhi që mund të cënojë integritetin e votës të trajtohet me urgjencë.
Prokurori i Shtetit ka bërë thirrje që çdo rast në të cilin dyshohet se vota po keqpërdoret apo manipulohet të raportohen menjëherë tek prokurorët përkatës. Ky apel ka për qëllim parandalimin e keqpërdorimeve dhe mbrojtjen e të drejtës së qytetarëve për të votuar në mënyrë të lirë dhe pa presione të jashtme.
Policia e Kosovës gjithashtu ka miratuar një plan operativ për zgjedhjet, i cili përfshin katër faza të rëndësishme. Kjo përfshin periudhën parazgjedhore për vlerësimin e sigurisë, angazhimin për sigurimin e fushatës zgjedhore, garantimin e sigurisë gjatë ditës së zgjedhjeve dhe periudhën paszgjedhore për transportin dhe mbrojtjen e materialeve të ndjeshme. Policia ka filluar angazhimin e saj me turne 12-orëshe, duke siguruar që procesi të zhvillohet pa ndërprerje dhe pa incidente.
Deri tani, janë realizuar dy faza të planit operativ të policisë, dhe forcat e sigurisë janë të angazhuara për të siguruar një ditë zgjedhjesh pa probleme. Policia e Kosovës ka shprehur përkushtimin e saj për të kryer detyrat dhe përgjegjësitë e saj ligjore në mënyrë profesionale, duke garantuar sigurinë dhe transparencën e procesit zgjedhor.
Në këtë kuadër, qytetarët inkurajohen të bashkëpunojnë me institucionet kompetente dhe të raportojnë çdo rast të kundërligjshëm që ka të bëjë me sigurinë dhe procesin zgjedhor, duke kontribuar kështu në një proces të pastër dhe të besueshëm.
