Një konflikt i nisur gjatë gatimit mes dy punonjësve të një lokali në Komunën e Parisit përfundoi me vrasjen e një 34-vjeçari, në sy të klientëve.
Ngjarja e rëndë ndodhi sot në një lokal në zonën e Komunës së Parisit në Tiranë. Dy punonjës të kuzhinës, Filip Shehu, 41 vjeç, dhe Indrit Ismaillari, 34 vjeç, po përgatisnin ushqimin kur një debat i papritur degjeneroi në dhunë.
Burimet tregojnë se sherri nisi për një tas me proshutë, një mosmarrëveshje krejtësisht banale që u shndërrua në konflikt të ashpër. Dy kolegët kishin pasur edhe më parë debate të vogla lidhur me punën, por asnjëherë nuk kishte ndodhur përplasja fizike.
Gjatë debatit, Shehu ka marrë një thikë kuzhine dhe ka sulmuar kolegun e tij në mes të ambientit të punës. Sulmi ndodhi përpara shumë klientëve dhe punonjësve, të cilët mbetën të shokuar nga ajo që panë.
Goditja fatale dyshohet se është dhënë në zonën e qafës, duke i shkaktuar viktimës plagë të rënda që çuan në vdekjen e menjëhershme. Ndihma e shpejtë nuk mundi ta shpëtonte jetën e të riut.
Stafi i lokalit ndërhyri me shpejtësi dhe arriti të neutralizojë autorin, i cili nuk po ndalonte sulmin. Më pas ai u dorëzua në duart e autoriteteve.
Policia ka nisur hetimet për zbardhjen e plotë të rrethanave, ndërsa komuniteti dhe familjarët janë tronditur nga kjo ngjarje e rëndë që lindi nga një konflikt i nivelit të ulët, por që përfundoi tragjikisht.
