Presidenti i Ukrainës, Volodymyr Zelensky, ka sinjalizuar gatishmërinë për një kompromis të mundshëm lidhur me rajonin e Donbasit, duke theksuar se Kievi nuk synon të largohet nga zonat ku jetojnë rreth 300 mijë banorë, por është i hapur për zgjidhje të negociuara.

Në deklaratat e tij më të fundit, Zelensky raportoi shpërthime në Zaporizhia dhe Odessa dhe konfirmoi se më 6 janar në Francë do të zhvillohet një takim i udhëheqësve të Koalicionit të të Gatshmëve. Ai bëri të ditur se më herët, më 3 janar, në Ukrainë do të mbahet një takim paraprak mes këshilltarëve të sigurisë kombëtare, sipas marrëveshjes së arritur nga Sekretari i Këshillit të Sigurisë dhe Mbrojtjes Kombëtare, Rustem Umerov.

Zelensky theksoi se mbështetja amerikane mbetet vendimtare për Ukrainën. “Ukraina nuk mund të fitojë pa mbështetjen e SHBA-së”, deklaroi ai, duke shprehur mirënjohje ndaj ekipit të Presidentit amerikan Donald Trump për gatishmërinë për t’u përfshirë në formatet efektive të negociatave. Sipas tij, kontaktet mes ekipeve po vijojnë dhe prioritetet për hapat e ardhshëm janë diskutuar në mënyrë të vazhdueshme.

Presidenti ukrainas mohoi raportimet për një sulm të dyshuar me dron ndaj rezidencës së Vladimir Putinit, duke i quajtur ato të pavërteta dhe duke theksuar se nuk i beson udhëheqësit rus. “Nuk mendoj se ai dëshiron paqe. Kjo është arsyeja pse na duhet presioni i Trump përmes sanksioneve dhe dialogut”, u shpreh ai.

Në lidhje me Donbasin, Zelensky propozoi krijimin e një zone të veçantë ekonomike, duke sugjeruar një tërheqje të ndërsjellë të forcave. “Nëse tërhiqemi disa kilometra, edhe Rusia duhet të tërheqë forcat e saj në mënyrë të ngjashme. Rregulla të veçanta do të zbatohen në këtë zonë ekonomike speciale”, deklaroi presidenti ukrainas.