Koalicioni “Djathtas për Zhvillim” ka nisur ditën e sotme fushatën elektorale për Qarkun Fier, duke prezantuar kandidatët e tij për deputetë në kuadër të zgjedhjeve të 11 Majit. Gjatë një ceremonie të mbajtur në këtë qark, drejtuesi politik i Qarkut, Agron Kapllanaj, ka theksuar se ky koalicion do të jetë surpriza e zgjedhjeve të 11 Majit dhe se do të arrijë rezultate të shquara.
Kapllanaj e ka cilësuar këtë moment si një mundësi për të sjellë ndryshimin që qytetarët e Fierit presin. Ai ka shprehur besimin e tij se koalicioni do të japë një frymë të re në politikën e vendit dhe do të sjellë një ndryshim të vërtetë, duke përmendur se ky është koalicioni që do të mbledhë mbështetje të madhe nga qytetarët.
Nga ana tjetër, Enkelejd Alibeaj, kreu i “Djathtas 1912”, ka theksuar se e djathta ka qenë në një gjendje letargjie që nga viti 1991. Sipas tij, kjo ka sjellë largimin nga pritshmëritë e shqiptarëve dhe ka lënë vendin pa vlera identitare. Alibeaj ka theksuar se për shumë vite është neglizhuar besimi në atdhe, familje dhe individ, si dhe nuk janë promovuar vlerat tradicionale dhe besimi në Zot.
Në fjalën e tij, Dashamir Shehi, një nga figurat kryesore të koalicionit, ka shtuar se dy shtyllat kryesore të ekonomisë që do të mbështeten në programin e koalicionit janë industria dhe bujqësia. Ai ka nënvizuar se këto dy sektorë janë thelbësore për zhvillimin e vendit dhe do të kenë prioritet në politikat që do të ndjekë koalicioni “Djathtas për Zhvillim”. Shehi ka theksuar se ky koalicion nuk i ka borxh askujt dhe miqtë dhe aleatët e tij kanë zgjedhur rrugën e vet për të përballuar sfidat e ardhshme.
Shehi ka apeluar gjithashtu për një angazhim të fortë deri në ditën e zgjedhjeve. Ai ka bërë thirrje për mbledhjen e mijëra votave, duke shtuar se kjo luftë elektorale nuk është vetëm për të grumbulluar një numër votash, por për të dalë me krenari nga kjo histori. Ai ka shprehur bindjen se koalicioni “Djathtas për Zhvillim” do të arrijë të fitojë besimin e qytetarëve dhe të sjellë ndryshimin që Shqipëria ka nevojë.
