Adolfo “Fito” Macias, bosi famëkeq i drogës në Ekuador, kapet nga autoritetet pas një operacioni 10-orësh në qytetin Manta, ndërsa pritet ekstradimi në SHBA
Në një operacion të përbashkët të policisë dhe ushtrisë, autoritetet ekuadoriane kanë arrestuar Adolfo Macias Villamar, i njohur si “Fito”, kreu i bandës së rrezikshme “Los Choneros”. Ai u kap në një bunker nëntokësor, të ndërtuar poshtë një vile luksoze në qytetin bregdetar të Mantas, ku fshihej që pas arratisjes nga burgu në janar 2024.
Operacioni, që zgjati dhjetë orë, nuk hasi në rezistencë të armatosur. Forcat e sigurisë fillimisht rrethuan shtëpinë trekatëshe në lagjen Monterrey, ku më pas zbuluan një derë të kamufluar në dysheme, që çonte përmes një shkalle metalike në strehimin sekret të Fitos. Aty ishin instaluar një krevat, frigorifer, ventilator dhe sistem ajrimi, ndërsa në sipërfaqe vila kishte edhe palestër dhe dhomë lojërash.
Fito, i cili dyshohet se ka urdhëruar vrasjen e kandidatit presidencial Fernando Villavicencio në vitin 2023, nuk bëri përpjekje për t’u larguar gjatë aksionit. Ai u transferua menjëherë me helikopter në qytetin portual të Guayaquil dhe u vendos në burgun me siguri maksimale “La Roca”. Pamjet e publikuara e tregojnë të veshur me pantallona të shkurtra, bluzë dhe shapka, ndërsa shoqërohet nga forcat speciale drejt një automjeti të blinduar.
Presidenti i Ekuadorit, Daniel Noboa, përshëndeti aksionin dhe konfirmoi se Fito do të ekstradohet në SHBA, ku përballet me akuza për trafik ndërkombëtar droge. Kapja e tij vjen pas një arratisjeje që tronditi vendin dhe shkaktoi trazira të përgjakshme në burgjet ekuadoriane, ku të burgosur morën peng roje dhe shpërthyen dhunë të organizuar.
Fito ishte një figurë e fuqishme edhe pas grilave. Ai u bë udhëheqës i “Los Choneros” pasi pararendësi i tij u vra dhe që atëherë organizata kriminale u fuqizua ndjeshëm. Nga qelia, ai drejtonte rrjetin e trafikimit të drogës dhe zhvatjeve. Ai gjithashtu akuzohet se ka urdhëruar sulmin fatal ndaj Villavicencios në një tubim zgjedhor, pak ditë para votimeve të vitit 2023.
Nën drejtimin e Fitos, “Los Choneros” lidhën aleancë me kartelin meksikan “Sinaloa”, gjë që solli përhapjen e metodave brutale si prerjet e kokave dhe torturat. Arratisja e tij në janar ishte një grusht i rëndë për qeverinë e re të Noboas, i cili mori detyrën në nëntor 2023 me premtimin për të çmontuar rrjetet kriminale që po tronditin vendin. Arrestimi i Fitos përbën një fitore simbolike në këtë betejë të vështirë.
