Pas trajtimit veterinar dhe kujdesit emergjent, kali i djegur në zjarrin e Delvinës është në gjendje të mirë dhe nën kujdesin e një fondacioni gjerman.
Pamjet e zjarrit të fundit në Delvinë tronditën opinionin publik, jo vetëm për shkak të flakëve shkatërruese, por edhe për praninë e një kali të braktisur që ishte bërë viktimë e nxehtësisë dhe tymit. Ky moment u dokumentua nga kamera dhe u shpërnda gjerësisht në rrjetet sociale, duke nxitur reagimin e menjëhershëm të autoriteteve lokale.
Menjëherë pas sinjalizimit, Inspektori Veterinar i Bashkisë Delvinë, Artan Alinani, dhe ai i Njësisë Administrative Vergo, Ilir Liçaj, bashkë me Drejtorinë e Shërbimeve, ndërhynë për të shpëtuar dhe trajtuar kafshën. Kali iu nënshtrua mjekimit veterinar, mori ushqim dhe u sistemua në kushte të sigurta.
Sipas specialistëve, gjendja shëndetësore e kalit është përmirësuar ndjeshëm pas ndërhyrjeve të kryera. Lëkurat e djegura janë trajtuar dhe kafsha po merr kujdes të rregullt për të garantuar rikuperimin e plotë.
Një zhvillim pozitiv është se kali tashmë është marrë në kujdes nga një fondacion gjerman i specializuar në mbarështimin e kuajve, duke i siguruar atij jo vetëm trajtim afatgjatë, por edhe një ambient të përshtatshëm për jetesë.
Bashkia Delvinë dhe ekipi veterinar kanë theksuar se ky rast nuk duhet të shihet si një përjashtim, por si një standard i detyrueshëm i trajtimit të çdo kafshe që përballet me situata emergjente. Ata apeluan që çdo gjallesë, pavarësisht llojit, të marrë vëmendjen dhe kujdesin e duhur.
Ky rast shërben si shembull i bashkëpunimit mes institucioneve, specialistëve dhe organizatave ndërkombëtare për të mbrojtur jetën dhe dinjitetin e kafshëve.
