Kryeministri i Kanadasë, Justin Trudeau, njoftoi dorëheqjen e tij si lider i Partisë Liberale pas gati një dekade në krye të qeverisjes, duke deklaruar se ka luftuar për Kanadanë dhe qytetarët e saj gjatë gjithë mandatit të tij.
“Çdo mëngjes kur jam zgjuar si kryeministër, jam frymëzuar nga qëndrueshmëria, bujaria dhe vendosmëria e kanadezëve,” tha Trudeau në një konferencë shtypi të hënën. “Kam luftuar për këtë vend, për ju.”
Trudeau vuri në dukje disa nga arritjet më të mëdha gjatë drejtimit të tij që nga viti 2015, përfshirë mbështetjen për Ukrainën, menaxhimin e pandemisë Covid-19 dhe përkushtimin ndaj ndryshimeve klimatike. “Ne u bashkuam për të mbështetur njëri-tjetrin gjatë pandemisë, për të qëndruar të fortë me Ukrainën dhe demokracinë tonë, për të luftuar ndryshimet klimatike dhe për të përgatitur ekonominë tonë për të ardhmen,” tha ai. “Ne ndodhemi në një moment kritik në botë.”
Gjithsesi, Trudeau pranoi një pendesë gjatë deklaratës së tij për dorëheqje: sistemi zgjedhor i vendit. “Nëse kam një pendesë, veçanërisht ndërsa i afrohemi zgjedhjeve, është fakti që nuk arritëm të ndryshonim mënyrën se si zgjedhim qeveritë tona,” tha ai. “Do të doja që njerëzit të kishin mundësi të zgjedhin një opsion të dytë apo të tretë në të njëjtën fletë votimi.”
Për shkak të ngërçit politik dhe sesionit të gjatë të një parlamenti minoritar, Trudeau njoftoi gjithashtu pezullimin e parlamentit deri më 24 mars. “Parlamenti ka qenë i paralizuar për muaj të tërë pas sesionit më të gjatë të një parlamenti minoritar në historinë kanadeze,” tha ai. “Këtë mëngjes, i kërkova Guvernatores së Përgjithshme të fillojë një sesion të ri të parlamentit. Ajo e ka pranuar kërkesën dhe Doma e Përfaqësuesve do të jetë e pezulluar deri më 24 mars.”
Trudeau, 53 vjeç, konfirmoi se do të qëndrojë në detyrë si kryeministër kujdestar deri në zgjedhjen e liderit të ri të Partisë Liberale. “Unë synoj të jap dorëheqjen si lider i partisë dhe si kryeministër, pasi partia të zgjedhë liderin e saj të ri,” deklaroi ai në konferencën për shtyp në Ottawa.
Lideri që erdhi në pushtet me një mandat të fuqishëm të ndryshimit dhe përfshirjes, Trudeau u përball me sfida të shumta gjatë drejtimit të tij, por gjithashtu udhëhoqi vendin në momente të vështira globale dhe kombëtare. Në fjalimin e tij lamtumirës, ai dha një mesazh të fuqishëm për qëndrueshmërinë dhe të ardhmen e Kanadasë, duke e lënë të hapur rrugën për brezat e ardhshëm të liderëve politikë.
