Jozefina Topalli, drejtuese politike e PD-së për diasporën, akuzon për parregullsi në shpërndarjen e zarfeve për votimin e emigrantëve në Greqi dhe apelon për pjesëmarrjen në zgjedhjet e 11 majit.
Drejtoresha politike e Partisë Demokratike për diasporën, Jozefina Topalli, ka reaguar me shqetësim për një seri parregullsish të konstatuara në shpërndarjen e zarfeve me fletët e votimit për emigrantët në Greqi. Ajo ka ngritur alarmin në lidhje me faktin se shumë qytetarë shqiptarë marrin njoftim për tërheqjen e zarfit, por kur paraqiten në postë, ata gjejnë se zarfi është tërhequr më parë nga persona të tjerë. Kjo ka krijuar dyshime për manipulim dhe abuzime me procesin e votimit jashtë vendit.
Në një postim në rrjetet sociale, Topalli ka deklaruar: “Nga Greqia po na vijnë njoftime shqetësuese. Në shumë raste, qytetarët po marrin lajmërimin për të tërhequr zarfin, por kur shkojnë në postë – zarfi nuk është më aty! Dikush tjetër e ka marrë, dhe ndoshta e ka plotësuar në vend të tyre”. Ky zhvillim ka ngritur shqetësime të mëdha, pasi mund të cenohet integriteti i procesit zgjedhor.
Ajo gjithashtu ka theksuar se ka marrë informacione që makina nga Shqipëria kanë shkuar në Greqi për të mbledhur zarfe me fletët e votimit, një veprim që e ka cilësuar të paligjshëm dhe të dëmshëm për procesin e votimit. “Na informojnë gjithashtu se makina nga Shqipëria kanë shkuar për të mbledhur zarfat, kjo është tërësisht e paligjshme,” shkroi Topalli, duke theksuar se ky akt mund të ndikojë në vullnetin e qytetarëve dhe të prishë integritetin e zgjedhjeve.
Topalli i bëri thirrje të gjithë shqiptarëve që jetojnë jashtë vendit dhe që ende nuk janë regjistruar për të votuar nga jashtë, që të bëjnë sakrificën e të vijnë në Shqipëri më 11 maj për të dhënë votën e tyre. Ajo theksoi se kjo është një mundësi për të garantuar që vota e emigrantëve të jetë e sigurt dhe e paprekur nga çdo manipulim. “E di që jeni lodhur nga padrejtësitë. E di që jeni larg. Por sot, vendi ka nevojë për një sakrificë tjetër nga ju. Ejani më 11 maj në Shqipëri! Ejani për të votuar për kthesën e madhe! Për të ardhmen e fëmijëve tuaj. Për një Shqipëri që meriton më shumë,” shkroi ajo.
Me këtë apel, Topalli ka kërkuar që emigrantët shqiptarë të bëjnë një hap të rëndësishëm për të siguruar një Shqipëri të drejtë dhe të zhvilluar, ku vota e tyre do të respektohet dhe do të ndikojë në ndryshimin që ka nevojë vendi.
