Sistemi cloud i Microsoft-it shfrytëzohet për regjistrimin masiv të telefonatave nga Gaza dhe Bregu Perëndimor
Sipas një hetimi të përbashkët të gazetës “The Guardian” me revistën +972 dhe Israeli Local Call, Izraeli po përdor teknologjinë cloud të Microsoft për të mbikëqyrur në mënyrë masive telefonatat e palestinezëve. Ky sistem i avancuar u vendos në funksion në vitin 2022 dhe ruan çdo ditë miliona biseda telefonike nga Gaza dhe Bregu Perëndimor.
Raporti tregon se gjithçka nisi në fund të vitit 2021, kur CEO i Microsoft, Satya Nadella, zhvilloi një takim me komandantin e Njësisë 8200 të ushtrisë izraelite, Yossi Sariel, njësi kjo e specializuar në sigurinë dhe luftën kibernetike. Sariel kërkoi ndihmën e Microsoft për të transferuar një sasi të madhe të dhënash sekrete inteligjence në platformën Azure.
Me mbështetjen e Microsoft, Njësia 8200 krijoi një hapësirë të izoluar dhe të personalizuar brenda Azure, ku mund të ruante dhe analizonin me lehtësi informacionin masiv të komunikimeve. Kjo hapësirë u përdor për të ndërtuar sistemin e regjistrimit dhe ruajtjes së thirrjeve të palestinezëve në mënyrë të vazhdueshme dhe në një shkallë të gjerë.
Microsoft ka deklaruar se CEO Nadella nuk ka qenë në dijeni të detajeve të sakta të të dhënave që do të ruanin në cloud, por dokumentet dhe intervistat me 11 burime nga Microsoft dhe forcat ushtarake izraelite zbulojnë përdorimin e Azure për mbajtjen e këtij arkivi të madh të komunikimeve.
Ky sistem ka hapur shqetësime serioze në lidhje me privatësinë dhe përdorimin e teknologjisë për survejim masiv, duke sjellë debate për rolin e kompanive teknologjike në çështjet politike dhe të sigurisë në rajonin konfliktual.
