Lexues të shumtë lushnjarë, mes tyre fëmijë dhe shkrimtarë, mbushin bibliotekën e qytetit këtë verë për të përjetuar fuqinë e librit dhe artit
Në qytetin e Lushnjes, stina e verës ka sjellë me vete një rigjallërim të veçantë në Bibliotekën e qytetit. Qytetarë të moshave të ndryshme, veçanërisht në orët e para të mëngjesit, zgjedhin të kalojnë kohën duke lexuar, duke kërkuar libra të autorëve vendas dhe të huaj, si një formë e qetë dhe shpirtërore pushimi.
Ndryshe nga tendenca e përgjithshme për të kaluar verën në plazh ose në natyrë, shumë poetë, shkrimtarë dhe dashamirës të librit zgjedhin ambientet e bibliotekës si vend frymëzimi. Numri i lexuesve është ndjeshëm në rritje këtë sezon, sipas punonjësve të kësaj qendre kulturore.
Një vend të veçantë në këtë atmosferë kulturore zënë edhe fëmijët. Librit për fëmijë i kushtohet gjithnjë e më shumë vëmendje, me një frekuentim të përditshëm nga vogëlushët që eksplorojnë botën përmes poezisë dhe tregimeve të ndryshme.
Gjatë një vizite të ekipit të TV Apollon në Bibliotekën e qytetit, u realizua një intervistë me ish-gazetarin dhe shkrimtarin e njohur Ali Haka. Ai vlerësoi poetët lushnjarë dhe rolin e tyre në ruajtjen e penës artistike në qytet, si dhe përgëzoi Shoqatën e Artistëve dhe Shkrimtarëve për përkrahjen që i ofron krijimtarisë vendase.
Ali Haka theksoi gjithashtu mbështetjen institucionale të Bashkisë së Lushnjes nën drejtimin e kryetares Eriselda Sefa, duke e cilësuar si një faktor të rëndësishëm në promovimin e vlerave kulturore dhe artistike të qytetit.
Atmosfera në Bibliotekën e Lushnjes këtë verë dëshmon se leximi nuk është harruar dhe se libri vijon të mbetet një urë lidhëse mes brezave, një mundësi për zhvillim personal dhe frymëzim në çdo stinë.
Raporton nga Lushnja gazetari Ndriçim Gjoshi.
