Davide Pecorelli, ish-gjyqtari i futbollit dhe biznesmeni i dënuar me katër vite burg, denoncon kushtet e rënda të paraburgimit dhe synon ankimimin e masës së sigurisë në Gjykatën e Lartë.
Ai humbi 6 kilogramë gjatë grevës dyjavore të urisë dhe ndodhet në një qeli vetëm 16 metra katrorë me tetë të burgosur të tjerë.
Biznesmeni italian Davide Pecorelli, i dënuar nga Gjykata e Shkodrës për inskenimin e vdekjes së tij në Pukë rreth pesë vite më parë, ka dhënë një intervistë ekskluzive nga burgu 313, ku ndodhet prej 8 majit pas ekstradimit nga Italia. Në bisedën me mediat italiane, ai shpreh shqetësimet për kushtet e vështira të burgut, por thekson se ka mundësi të kontaktojë rregullisht me familjen e tij, përfshirë gruan, katër fëmijët dhe babanë.
Pecorelli tregoi se kishte ndërprerë grevën e urisë pas dy javësh, duke humbur rreth 6 kilogramë në këtë periudhë. Ai pritet të depozitojë ankimimin e masës së sigurisë “arrest me burg” në Gjykatën e Lartë, duke shpresuar në një masë më pak shtrënguese në pritje të apelimit, që do të shqyrtohet më 18 shtator. Aktualisht, ai po përballet me akuza për mashtrim, dhunim të varreve, shkatërrim prone me zjarr dhe kalim të paligjshëm të kufirit.
Një kthesë e rëndësishme në çështjen e tij erdhi më 31 korrik, kur Gjykata e Apelit në Shqipëri depozitoi arsyetimin e vendimit të dënimit, duke i mundësuar Pecorellit të paraqesë rekurs në Gjykatën e Lartë. Gjatë grevës, Pecorelli kishte denoncuar kushtet skandaloze të paraburgimit: një qeli prej 16 metrash katrorë me tetë persona, mungesë ujë të rrjedhshëm dhe prani të minjve.
Në intervistë, ai përmend marrëdhëniet e mira me të burgosurit e tjerë dhe tregon se çdo mbrëmje gatuan makarona për ta, duke u përpjekur të përballojnë së bashku kushtet ekstreme të burgut. Ekstradimi i tij në Shqipëri u konfirmua nga Ministria e Drejtësisë italiane në mars të këtij viti, pas miratimit të gjykatës së Apelit të Perugias dhe vendimit final të ministrit Carlo Nordio.
Pecorelli ishte zhdukur në janar 2021 në Pukë, ku u gjet makina e tij e djegur me mbetje skeletore brenda. Për muaj me radhë, autoritetet shqiptare dhe italiane kërkonin informacion për fatin e tij, deri në momentin kur më 17 shtator ai u shfaq i gjallë pranë ishullit Montecristo. Ai deklaroi se gjatë kohës së zhdukjes kërkonte një thesar, duke habitur shumë dhe duke komplikuar më tej këtë histori të pazakontë.
Gjykata e Shkodrës e dënoi Pecorellin me katër vite burg në prill të këtij viti. Prokuroria e Pukës, pas hetimeve të mbyllura në tetor 2022, e akuzoi për pesë vepra penale, përfshirë mashtrimin në bashkëpunim dhe veprime që pengojnë zbulimin e së vërtetës, duke kërkuar tetë vite burg, por gjykata dha dënimin më të lehtë. Kjo është historia e një biznesmeni që inskenoi vdekjen për t’i shpëtuar borxheve, por që tani përballet me drejtësinë dhe kushte të rënda brenda mureve të burgut.
