Një 27-vjeçar i shpallur në kërkim ndërkombëtar për vrasje është arrestuar në Tiranë nga strukturat e Policisë së Shtetit.

Sipas njoftimit zyrtar, bëhet fjalë për shtetasin me inicialet A. M., ndaj të cilit autoritetet gjyqësore të Mbretërisë së Bashkuar kanë caktuar masën e sigurisë “arrest në burg” për veprën penale të vrasjes. Arrestimi u krye nga specialistët për Hetimin e Krimeve të Rënda, në kuadër të bashkëpunimit ndërkombëtar policor.

Interpol Tirana ka nisur procedurat për koordinimin me autoritetet britanike, me qëllim përfundimin e procesit të ekstradimit të 27-vjeçarit drejt Mbretërisë së Bashkuar.

Materialet procedurale i janë referuar Prokurorisë së Tiranës për veprime të mëtejshme ligjore, ndërsa i arrestuari pritet të përballet me drejtësinë në shtetin që e kërkon për akuzën e rëndë penale.