Pas ndeshjes Dinamo–Jagiellonia në Tiranë, tifozë polakë provokuan rëndë, u përleshën me vendasit dhe sulmuan me flakadanë autobusët në rrugën për në aeroport.
Tirana përjetoi një mbrëmje të tensionuar të enjten vonë, pas barazimit 1-1 mes Dinamos dhe Jagiellonias në play-off të Conference League. Tifozët polakë, të ardhur në numër të madh, nisën provokimet që me mbërritjen në kryeqytet, duke bërë gjeste të turpshme pranë bustit të Gjergj Kastriotit Skënderbeut në qendër të qytetit.
Pamjet e publikuara në rrjete sociale tregojnë qartë skenat e provokimit. Pas ndeshjes në “Air Albania”, një grup tifozësh shqiptarë, mes tyre edhe mbështetës të Dinamos, u përleshën fizikisht me një prej polakëve të përfshirë në gjestet fyese. Përplasja ndodhi në rrugë dhe u dokumentua nga disa video.
Policia ndërhyri me forca të shumta për të qetësuar situatën. Megjithëse tifozët e Jagiellonias u shoqëruan me autobusa nga stadiumi drejt aeroportit “Nënë Tereza” në Rinas, incidentet nuk u shmangën as gjatë rrugës.
Në hyrje të Rinasit, disa shqiptarë hodhën flakadanë drejt autobusëve polakë, duke reaguar ndaj thirrjeve provokuese “vritini shqiptarët” dhe banerit të njohur të tifozëve polakë “Kosova është Serbi”, i shfaqur shpesh në stadiume.
28.08.2025, FC Dinamo City🇦🇱 – Jagiellonia Bialystok🇵🇱, Eagle boys (Albania U18 group) found one of jagiellonia fans who was disrespecting Skenderbeg statue in city centre, click for more here: https://t.co/XvVfX9iZ82
— Hooligans.cz Official (@hooliganscz1999) August 28, 2025
All in one place. Tap to download.
🔗… pic.twitter.com/mb8EQFpnrD
Përdhosja e bustit të Skënderbeut mbetet momenti më i rëndë i mbrëmjes, një akt që ndezi zemërimin e shumë qytetarëve. Dinamo, pavarësisht barazimit, u eliminua nga Conference League, por ngjarjet jashtë fushës u bënë kryefjalë e mbrëmjes.
