Ministri i Brendshëm, Ervin Hoxha, së bashku me Drejtorin e Përgjithshëm të Policisë së Shtetit, Ilir Proda, kanë nisur prezantimin e 12 drejtorëve të rinj vendorë të policisë nëpërmjet një ceremonie të mbajtur në Tiranë.
Ky është një hap i rëndësishëm në forcimin e strukturave të sigurisë në vend, me synimin për të përmirësuar efikasitetin dhe reagimin e shpejtë ndaj sfidave të sigurisë publike.
Një nga emërimet më të rëndësishëm është ai i Elton Alushit, i cili do të udhëheqë strukturat e policisë në kryeqytet. Ministri Hoxha theksoi se ky emërim është një hap përpara në konsolidimin e sistemeve të sigurisë, si dhe një angazhim për të përmbushur pritshmëritë e qytetarëve të Tiranës. Ai theksoi se qyteti ka sfida të shumta dhe dinamike që kërkojnë një polici të aftë për të reaguar në kohë dhe për të garantuar rendin dhe sigurinë.
Sipas ministrit, Tirana, si zemra administrative, ekonomike dhe sociale e vendit, kërkon një polici jo vetëm vigjilente, por edhe të afërt me komunitetin. “Policia duhet të jetë një partner besnik për qytetarët, duke ndërtuar ura besimi dhe bashkëpunimi me ta”, shtoi Hoxha. Ai kërkoi gjithashtu që ngjarjet kriminale të zgjidhen me shpejtësi dhe që hetimet për ngjarje të vjetra të rihapen, pasi ato mund të krijojnë pasoja të mëtejshme nëse nuk ndëshkohen.
Në Durrës, ministri Hoxha prezantoi Vilson Balën si Drejtorin e ri të Drejtorisë së Policisë në këtë qytet strategjik. Durrësi ka një rëndësi të veçantë për sigurinë e vendit, pasi është një portë hyrëse dhe një qendër ekonomike, turistike dhe tranzit. Kjo e bën qytetin të përballet me sfida komplekse në fushën e sigurisë publike dhe luftën kundër kriminalitetit.
Ndërkohë Skënder Hitaj merr detyra të rëndësishme në Fier, në një kohë kur pasiguritë janë rritur në qytet.
Hoxha theksoi se drejtimi i strukturave policore në Durrës kërkon një vizion të qartë dhe një angazhim maksimal për të zbatuar ligjin me paanshmëri dhe profesionalizëm. Ai vlerësoi eksperiencën e Balës dhe theksoi se për t’u përballur me këto sfida, është e domosdoshme që të ketë një qasje të mirëkoordinuar me agjencitë ligjzbatuese dhe të luftohet çdo formë e krimit të organizuar, trafikut dhe evazionit.
Ministri i Brendshëm po ashtu theksoi rëndësinë e një bashkëpunimi të ngushtë ndërmjet forcave të policisë dhe qytetarëve për të garantuar sigurinë dhe rendin në shoqëri. “Siguria nuk është vetëm një përgjegjësi e policisë, por një detyrë e përbashkët e gjithë shoqërisë”, përfundoi Hoxha, duke apeluar për një angazhim të përbashkët për një Durrës dhe një Shqipëri më të sigurt.
Në fund të prezantimit, Hoxha dhe Proda shprehën besimin se emërimi i drejtorëve të rinj do të sjellë një rritje të mëtejshme të efikasitetit të policisë dhe do të forcojë sigurinë në qytetet e Shqipërisë. Ministri premtoi mbështetje të plotë për të gjitha strukturat e policisë dhe u angazhua për të siguruar që ato të kenë mjetet dhe mbështetje të nevojshme për të përballuar çdo sfidë që mund të paraqitet në të ardhmen.
