Trupi i 23-vjeçarit Renis Dobra u gjet me plagë në trup dhe shenja në fyt, ndërsa kamerat zbulojnë një automjet që e ndiqte nga Zenishti në Burrel
Detaje të reja dhe tronditëse janë zbuluar nga vrasja e 23-vjeçarit Renis Dobra në zonën e Ulëzës në Mat, ndërsa hetimet po përqendrohen tek një pistë e dyshuar rrëmbimi.
Analizimi i kamerave të sigurisë përgjatë rrugës ka çuar në zbulimin e një automjeti që e ka ndjekur të riun nga fshati Zenisht deri në qytetin e Burrelit, pak para se ai të zhdukej.
Ekspertiza mjeko-ligjore, e kryer nga specialistët e ardhur nga Tirana, ka evidentuar shenja dhune në trupin e viktimës, përfshirë plagë të dukshme dhe nxirje në zonën e fytit. Megjithatë, shkaku zyrtar i vdekjes ende nuk është përcaktuar.
Ngjarja mori përmasa dramatike kur babai i të riut raportoi zhdukjen e tij në orën 21:30 të mbrëmjes së djeshme. Ai deklaroi përpara autoriteteve se prej më shumë se tre orësh nuk kishte mundur të komunikonte me të birin.
Burime të afërta me hetimin thanë ekziston dyshimi se i riu mund të jetë rrëmbyer përpara se të vritej, ndërsa pista e ndjekjes me automjet konsiderohet si një element kyç në zbardhjen e dinamikës së krimit.
Grupi hetimor vijon punën për të identifikuar automjetin e dyshuar dhe për të zbuluar identitetin e personave që ndodheshin në të, ndërsa nuk përjashtohet asnjë pistë për motivin e mundshëm të ngjarjes.
Ngjarja ka tronditur komunitetin lokal, ndërkohë që autoritetet janë vënë në alarm për zbardhjen e plotë të këtij krimi të rëndë që ka lënë pas shumë pikëpyetje.
