Një operacion i gjerë i policisë ka zbuluar një skemë të rëndë ndotjeje në Elbasan, ku dy kompani të licencuara për përpunimin e metaleve joferroze dhe plastikës rezultojnë se i digjnin mbetjet në mënyrë të paligjshme. Në vend të furnaltave dhe filtrave të posaçëm, hetuesit gjetën vatra zjarri dhe shtëllunga tymi helmues.
Në pranga ranë gjashtëmbëdhjetë persona nëntë prej tyre shtetas të huaj nga Koreja dhe India, që punonin si operatorë furre e shoferë, si edhe shtatë shqiptarë me role drejtimi në kompani. Ata akuzohen për ndotje të rëndë të mjedisit, punësim të paligjshëm dhe pastrim parash.
Ndër të arrestuarit është edhe një punonjës i bashkisë Elbasan, i cili sipas policisë deklaronte në procesverbal se nuk kishte ndotje, ndërkohë që ekspertët e sjellë nga Tirana zbuluan nivele shumëfish mbi normat e lejuara.
Policia ka shpallur në kërkim aksionerët e kompanive CCALV SHPK dhe GSA Ferrokrom SHPK: Bujar Zogu, Dritan Konica, Faejzo Mecaj, Ilir Londo, Gjergj Bezati, Agron Shapllo dhe Serafin Orgocka. Kompanitë janë gjobitur dhe kanë marrë urdhër pezullimi derisa të plotësojnë kushtet ligjore.
Rasti ka tronditur qytetin, ndërsa pritet reagimi i prokurorisë, që do të vendosë masat e mëtejshme për shkeljet e rënda mjedisore dhe financiare.
