Sipas Hamasit, Netanyahu refuzon marrëveshjen e armëpushimit dhe insiston të lirojë vetëm 10 pengje në fazën e parë të shkëmbimit
Zyrtari i lartë i Hamasit, Mahmoud Mardawi, ka hedhur akuza të ashpra ndaj kryeministrit izraelit Benjamin Netanyahu, duke e fajësuar për bllokimin e progresit në bisedimet për armëpushim në Rripin e Gazës. Ai deklaroi se Netanyahu ka vendosur kushte të papranueshme, të cilat, sipas tij, po sabotojnë qëllimisht një marrëveshje për ndalimin e luftës dhe shkëmbimin e të burgosurve.
Përmes një deklarate të publikuar në kanalin e tij në Telegram, Mardawi tha se Netanyahu nuk po respekton termat e një marrëveshjeje të mëparshme që vetë e ka pranuar. Ai theksoi se kryeministri izraelit po insiston në lirimin e vetëm 10 pengjeve në një fazë të parë, në vend që të angazhohet për lirimin e plotë të tyre.
Sipas tij, kryeministri po manipulon procesin duke zgjedhur personalisht emrat e pengjeve që do të lirohen, gjë që Hamasi e sheh si provë të qartë se Netanyahu nuk është i interesuar për një zgjidhje të vërtetë. “Ai nuk dëshiron marrëveshje. Ai gënjen kur thotë se nuk ka dorë në përzgjedhjen e pengjeve,” u shpreh Mardawi.
Këto deklarata përkojnë me një klimë gjithnjë e më të tensionuar në rajon, ku përpjekjet ndërkombëtare për ndërmjetësim janë duke u zvarritur. Vendet ndërmjetësuese po përballen me mosmarrëveshje të thella mes palëve, ndërsa situata humanitare në Gaza përkeqësohet dita-ditës.
Hamasi kërkon një marrëveshje gjithëpërfshirëse që përfshin një armëpushim të qëndrueshëm dhe lirimin e të gjithë të burgosurve palestinezë. Nga ana tjetër, qeveria izraelite mbetet e ndarë mes presionit të aleatëve ndërkombëtarë dhe qëndrimeve të brendshme politike.
Përplasja për numrin dhe emrat e pengjeve ka bllokuar edhe një herë rrugën drejt një zgjidhjeje të mundshme, ndërsa qytetarët e prekur nga lufta mbeten peng të llogarive politike. Analistët paralajmërojnë se çdo vonesë shtesë mund të përshkallëzojë më tej situatën në terren.
