Një gropë e re karstike është shfaqur në periferi të Belshit në ditët e para të dhjetorit, duke rikthyer shqetësimin e vjetër për zonën e Dumresë, e cila prej dekadash njihet për formacionet karstike që kanë krijuar plot 84 liqene. Gropa e fundit është hapur në lagjen Hysa, rreth një kilometër larg qendrës së qytetit, në një zonë të banuar nga dhjetëra familje.
Sipas banorëve të zonës, gropa po zgjerohet dhe po bëhet më e thellë çdo ditë, duke nxitur frikë dhe pasiguri për sigurinë e banesave dhe të fëmijëve që lëvizin në afërsi. Informacionet nga terreni tregojnë se fenomeni ka shkaktuar ndryshim të dukshëm të sipërfaqes së tokës, duke bërë që shumë banorë të ndihen të kërcënuar dhe të kërkojnë ndërhyrje të shpejtë nga autoritetet.
Për momentin, autoritetet vendore u kanë bërë thirrje banorëve të qëndrojnë larg zonës së rrezikut, sidomos fëmijëve, të cilët janë më të ekspozuar për shkak të pamundësisë për të kuptuar pasojat e këtij fenomeni natyror. Në orët e ardhshme pritet të nisë rrethimi i perimetrit ku është hapur gropa, ndërsa më pas do të fillojë procesi i mbushjes me inerte për të shmangur çdo incident të mundshëm.
Fenomenet karstike janë të zakonshme në Dumre, por kur shfaqen pranë zonave të banuara, rritet urgjenca për masa parandaluese dhe studime më të thelluara gjeologjike, për të siguruar mbrojtjen e banorëve dhe të infrastrukturës.
