Ministria e Bujqësisë dhe Zhvillimit Rural ka deklaruar se situata lidhur me gripin e shpendëve në Shqipëri është nën kontroll të plotë dhe monitorim të vazhdueshëm.
Përmes strukturave qendrore dhe rajonale, autoritetet janë duke ndërmarrë masa konkrete për të parandaluar përhapjen e virusit.
Sipas deklaratës zyrtare, sëmundja e Influencës Aviare, e cila ka prekur edhe Shqipërinë, është një fenomen me përhapje globale. Organizata Botërore e Shëndetit të Kafshëve ka njoftuar se kjo sëmundje është e pranishme në shumë vende të botës, të cilat zbatojnë programe të ngjashme kontrolli dhe mbikëqyrjeje si në Shqipëri. Parandalimi i përhapjes së këtij infeksioni mbetet i mundur përmes masave të biosigurisë, të cilat kufizojnë kontaktin me shpendët portatorë, të egër apo migratorë.
Që nga konfirmimi i rastit të parë, është aktivizuar Qendra Kombëtare e Krizës për Influencën Aviare. Ky grup pune, që përfshin përfaqësues nga Ministria e Bujqësisë, Ministria e Brendshme, Ministria e Turizmit dhe Mjedisit, dhe Instituti i Shëndetit Publik, po koordinon veprimet për të monitoruar situatën dhe për të përforcuar masat mbrojtëse.
Në terren, janë identifikuar zona specifike të mbrojtjes dhe mbikëqyrjes rreth vatrave të infeksionit, përfshirë Zall Herr, Nartë, Paskuqan dhe Lagunën e Karavastasë, ku u konfirmua një vatër e re më 9 janar 2025.
Shërbimi Veterinar Rajonal ka ndërmarrë hapa të rëndësishëm për izolimin e infeksionit dhe parandalimin e përhapjes së tij. Ky shërbim po bashkëpunon ngushtë me Agjencinë e Zonave të Mbrojtura për monitorimin e faunës së egër në zonat lagunore dhe ujore të mbrojtura.
Njësitë Vendore të Kujdesit Shëndetësor po kryejnë teste mbi personat që kanë pasur kontakt me shpendët e infektuar. Deri më tani, të gjitha testet kanë rezultuar negative, duke shmangur shqetësimet për përhapje tek njerëzit.
Ndërkohë, policia dhe autoritetet vendore janë angazhuar për të zbatuar masat kufizuese, duke përfshirë ndalimin e lëvizjes së shpendëve të gjallë jashtë fermave të ndodhura në zonat e mbrojtjes dhe mbikëqyrjes.
Ministria e Bujqësisë ka nënvizuar rëndësinë e vigjilencës nga ana e fermerëve dhe qytetarëve. Bashkëpunimi i tyre është thelbësor për raportimin e rasteve të dyshimta dhe zbatimin e masave të biosigurisë, si mbajtja e shpendëve në mjedise të mbyllura për të shmangur kontaktin me shpendët e egër.
Pavarësisht situatës së kontrolluar, Ministria kërkon që qytetarët të jenë të kujdesshëm dhe të raportojnë çdo rast të dyshuar në numrin e gjelbër 08003366. Rritja e ndërgjegjësimit publik dhe respektimi i masave mbrojtëse janë thelbësore për minimizimin e rrezikut.
Situata mbetet nën monitorim të vazhdueshëm, dhe autoritetet janë të angazhuara për të garantuar sigurinë e shëndetit publik dhe mbarështimin e qëndrueshëm të shpendëve në vend.
