Gjermania ka marrë një hap tjetër në luftën kundër emigracionit të paligjshëm, duke zgjeruar kontrollet kufitare për një periudhë shtesë prej gjashtë muajsh.
Këto masa, të cilat tashmë do të qëndrojnë në fuqi deri më 15 shtator, janë ndërmarrë në përpjekje për të frenuar migrimin ilegal në vend, një temë që ka marrë shumë vëmendje përpara zgjedhjeve federale të planifikuara për më 23 shkurt. Kancelari Olaf Scholz ka konfirmuar këtë vendim, duke e bërë të ditur se administrata e tij ka informuar Komisionin Evropian për masat e reja.
Scholz ka theksuar se këto kontrolle kufitare kanë dhënë rezultate të dukshme, duke zvogëluar me sukses migrimin e parregullt, dhe ka shtuar se shifrat flasin vetë. “Me kontrollin e kufijve, po e zvogëlojmë migrimin e paligjshëm. Shifrat e tregojnë këtë,” ka deklaruar ai. Sipas tij, këto masa kanë rezultuar efektive që nga zbatimi i tyre në vjeshtën e kaluar.
Përveç kësaj, autoritetet gjermane kanë arritur të kthejnë 47,000 individë në kufijtë e tyre dhe të regjistrojnë një ulje të ndjeshme prej një të tretës në kërkesat për azil. Po ashtu, janë arrestuar 1,900 individë që dyshohen për kontrabandë të emigrantëve. Ky rezultat tregon një angazhim të fortë të autoriteteve gjermane për të kontrolluar rrugët e emigracionit të paligjshëm.
Gjermania ka vendosur kontrollle kufitare edhe me disa shtete fqinje, si Polonia, Republika Çeke, Austria dhe Zvicra, dhe ka zgjeruar këto kontrolle që nga shtatori i vitit të kaluar, duke përfshirë gjithashtu kufijtë me Francën, Luksemburgun, Holandën, Belgjikën dhe Danimarkën. Ky hap është ndërmarrë në një përpjekje për të mbajtur kontroll mbi lëvizjen e emigrantëve të paligjshëm dhe për të forcuar sigurinë në kufij.
Zona Shengen e Bashkimit Evropian, që lejon udhëtimin pa viza ndërmjet shumicës së shteteve anëtare, është e prekur nga këto masa, por BE-ja lejon kontrollle të përkohshme kufitare në rastet e kërcënimeve serioze të sigurisë. Këto kontrolle, megjithatë, duhet të jenë të kufizuara në kohë dhe të konsiderohen si një mjet të fundit për të adresuar rreziqet e sigurisë.
Me këtë vendim të Gjermanisë, që ka marrë një rol udhëheqës në mbrojtjen e kufijve të saj dhe të Bashkimit Evropian, shtohen presionet mbi vendet e tjera të BE-së për të marrë masa të ngjashme për të adresuar krizën e emigracionit.
