Kujtim Buzi, 65-vjeçari nga Divjaka, është një prej fermerëve që ka zgjedhur të ruajë traditën e rritjes së gjelit të detit , mbreti i tavolinës në festat e fundvitit. Prej më shumë se gjashtë vitesh, ai kujdeset me përkushtim për fermën e tij familjare ku rrit çdo vit 400 deri në 450 krerë gjela e pula deti.
Ferma ndodhet në natyrë të hapur dhe gjithë shpendët rriten me ushqim bio, në parcelat e mbjella me bar natyral, larg çdo ushqimi të përpunuar. “Gjithë familja është përkushtuar në këtë punë, por asnjë ndihmë apo subvencion nuk kemi marrë nga institucionet përkatëse,” shprehet Kujtimi me zhgënjim.
Ai tregon se shpenzimet këtë vit kanë arritur mbi 8 milion lekë të vjetra, ndaj shpreson që në prag të festave të fundvitit, çmimi për kilogram të gjelit të detit të shkojë të paktën 10 mijë lekë të vjetra për të mbuluar koston dhe mundin e një viti të tërë pune.
“Rritja e shpendëve të detit kërkon durim, kujdes, dhe një vit të tërë angazhim. Nuk është si në stallë, është punë me natyrën, me motin, me cilësinë e jetesës së shpendit,” shton ai.
Gjeli i detit, simbol i festave tradicionale shqiptare, vijon të ketë rëndësi të veçantë në tryezat e fundvitit, por për fermerë si Kujtimi, sfida më e madhe mbetet mungesa e vëmendjes nga shteti ndaj prodhimit vendas dhe fermerit të thjeshtë.
Gazetari Ndricim Gjoshi .
