Valerie Zink largohet nga Reutersi pas tetë vitesh, duke akuzuar agjencinë për justifikimin e vrasjes së qindra gazetarëve në Gaza dhe shërbim ndaj propagandës izraelite.
Gazetarja dhe fotografja kanadeze Valerie Zink ka dhënë dorëheqjen nga Reutersi pas tetë vitesh bashkëpunim, duke e akuzuar agjencinë se ka marrë rol aktiv në justifikimin dhe mundësimin e vrasjes së 245 gazetarëve në Gaza. Ajo e ka cilësuar këtë qëndrim si një “tradhti ndaj gazetarëve” dhe ka theksuar se media perëndimore mban përgjegjësi direkte për situatën.
Në një deklaratë të gjatë, Zink shpjegoi se gjatë viteve të punës së saj, fotot e saj janë botuar nga media të mëdha si New York Times dhe Al Jazeera. Por, sipas saj, qëndrimi i Reutersit ndaj sulmeve kundër gazetarëve palestinezë ka bërë të pamundur çdo vazhdim bashkëpunimi.
Ajo theksoi rastin e 10 gushtit, kur forcat izraelite vranë Anas Al-Sharifin dhe ekipin e tij të Al Jazeera-s. Reuters publikoi pretendimin e pabazë të Izraelit se Al-Sharifi ishte pjesëtar i Hamasit, duke e përsëritur atë si fakt. Zink akuzoi agjencinë se ka legjitimuar gënjeshtra të tilla dhe nuk ka mbrojtur as gazetarët e vet nga sulmet izraelite.
Në sulmin ndaj spitalit Nasser, ku u përdor taktika e ashtuquajtur “double tap”, u vranë pesë gazetarë, përfshirë kameramanin e Reuters Hossam Al-Masri. Zink tha se ky është një shembull i qartë se si propagandës i është dhënë përparësi mbi të vërtetën, duke e bërë median bashkëpërgjegjëse për krimet e kryera.
Sipas saj, mediat perëndimore, nga New York Timesi te Washington Posti e deri te Reutersi, janë kthyer në “shirit transportues” të propagandës izraelite, duke minimizuar krimet e luftës dhe duke çnjerëzuar viktimat. Ky qëndrim, sipas saj, ka krijuar terrenin për më shumë vrasje të gazetarëve sesa në të gjitha luftërat e shekullit të fundit të marra së bashku.
Zink solli në vëmendje se puna e Al-Sharif fitoi një çmim Pulitzer për Reuters, por kjo nuk e shtyu agjencinë të reagonte kur ai u fut në listën e gazetarëve për t’u vrarë nga ushtria izraelite. Ajo tha se agjencia nuk e mbrojti as kur ai kërkoi ndihmë publike, as kur u vra disa javë më pas.
Gazetarja tha se ndihet e turpëruar që ka mbajtur kartelën e Reuters ndërsa kolegët në Gaza janë vrarë. Ajo premtoi që nga tani e tutje çdo kontribut i saj të jetë me synimin për të nderuar guximin dhe sakrificën e gazetarëve palestinezë, të cilët i quajti “më të guximshmit dhe më të mirët që kanë jetuar ndonjëherë”.
Sipas Zinkut, ky vendim është një detyrim moral ndaj kolegëve që kanë humbur jetën, një mënyrë për të refuzuar normalizimin e propagandës dhe për të ruajtur integritetin e profesionit të saj.
