Legjenda e Romës, Francesco Totti, është përballur me një tjetër episod të vështirë, këtë herë nga organet ligjore të Italisë.
Pas akuzave të ish-bashkëshortes Ilary Blasi për braktisjen e fëmijëve, ish-kapiteni i Romës po hetohet nga Prokuroria Publike e Romës për mosdeklarimin e të ardhurave dhe shmangien e detyrimeve tatimore.
Sipas gazetës italiane La Verità, hetimi lidhet me të ardhura të pashpallura që rrjedhin nga kontratat publicitare të Tottit. Guardia di Finanza ka zbuluar se futbollisti nuk kishte paguar tatime për një shumë fillimisht të vogël, por që u rrit në rreth 200,000 euro për shkak të interesave.
Pavarësisht se Totti vendosi të mbyllë mosmarrëveshjen duke shlyer shumën e pretenduar nga autoritetet, çështja nuk përfundoi aty. Fiamme Gialle, departamenti sportiv i policisë financiare italiane, ia referoi rastin Agjencisë së të Ardhurave dhe Prokurorisë. Si rezultat, prokurorët në fillim të vjeshtës vendosën ta përfshinin atë në regjistrin e të dyshuarve për mosdeklarim të të ardhurave.
Prokuroria ka planifikuar të thërrasë Tottin për t’u paraqitur në mes të dhjetorit. Prokurori Vincenzo Barba do të jetë përgjegjës për mbikëqyrjen e hetimeve që tani janë në fazën vendimtare.
Sipas ligjit italian, konkretisht nenit 5 të Dekretit Legjislativ 74/2000, evazioni fiskal në këto përmasa mund të rezultojë në një dënim nga 2 deri në 5 vjet burg. Kjo përbën një goditje të rëndë për figurën publike të Tottit, i cili vazhdon të mbetet një ikonë për tifozët e Romës.
Gazeta milaneze thekson se hetimet nuk lidhen me pretendimet e Ilary Blasi për llogari të supozuara të fshehta jashtë vendit, në Singapor dhe SHBA, siç kishte pohuar ish-bashkëshortja e tij. Përkundrazi, çështja është fokusuar ekskluzivisht në të ardhurat nga reklamat.
Ky episod shton një tjetër kapitull të vështirë në jetën personale dhe profesionale të Tottit, i cili për dekada me radhë ishte simbol i lojalitetit dhe krenarisë romane. Tashmë, legjenda verdhekuqe përballet me një sprovë ligjore që mund të ketë pasoja të rënda për të ardhmen e tij.
