Gjenerali Thierry Burkhard paralajmëron rritjen e rrezikut rus në hapësirë dhe në dete, duke e cilësuar Moskën si një kërcënim të përhershëm për sigurinë kombëtare franceze
Franca ka rritur tonet ndaj Rusisë, duke e konsideruar sjelljen e saj si një kërcënim serioz për stabilitetin dhe sigurinë strategjike. Shefi i Shtabit të Mbrojtjes franceze, Thierry Burkhard, paralajmëroi gjatë një konference të pazakontë për shtyp se Moska po synon të militarizojë hapësirën dhe po shfaq aktivitete të rrezikshme nënujore pranë interesave franceze.
Sipas Burkhard, nëndetëset ruse po depërtojnë rregullisht në Atlantikun e Veriut dhe lëvizin më pas në Mesdhe, duke u vendosur në afërsi të zonave me rëndësi për interesat ushtarake dhe ekonomike të Francës. Ai e përshkroi këtë sjellje si “shqetësuese në ekstrem”.
Po ashtu, gjenerali francez denoncoi edhe përdorimin e satelitëve rusë për qëllime spiunazhi dhe ndërhyrjesh në pajisjet franceze në hapësirë. Ai theksoi se disa prej këtyre satelitëve janë të dizajnuar posaçërisht për veprime që bien ndesh me ligjet ndërkombëtare për demilitarizimin e hapësirës.
Deklaratat e Burkhard erdhën pak ditë para një fjalimi të rëndësishëm që pritet nga Presidenti Emmanuel Macron mbi strategjinë e re të mbrojtjes kombëtare. Gjenerali synoi të informojë publikun për sfidat reale që kërcënojnë vendin, përpara se të bëhen publike vendime të mundshme mbi politikat e sigurisë dhe investimet ushtarake.
Burkhard ngriti shqetësimin se, përveç Rusisë, edhe zhvillimet e fundit në Lindjen e Mesme dhe rajone të tjera e kanë komplikuar më tej situatën për trupat franceze në misione jashtë vendit.
Nëse bien dakord strukturat politike, Franca pritet të rrisë buxhetin ushtarak në 67.4 miliardë euro deri në vitin 2030, nga 50.5 miliardë që janë aktualisht. Burkhard nuk kërkoi drejtpërdrejt një rritje financimi, por e pranoi se përballja me këto sfida të shumta “ka padyshim një kosto”.
Me sfidat në rritje në hapësirë, nën ujë dhe në mjedise të ndërlikuara gjeopolitike, autoritetet franceze po e rishikojnë me urgjencë strategjinë e sigurisë për të ruajtur pavarësinë, ndikimin dhe mbrojtjen e interesave kombëtare në çdo nivel.
