Gjatë sezonit të verës, fluksi i shtuar i mjeteve brenda dhe jashtë qytetit të Lushnjes ka qenë një sfidë për qarkullimin, por qytetarët shprehen pozitivisht për punën e palodhur të efektivëve të Komisariatit të Lushnjes.
Në kushte të vështira atmosferike, ku temperaturat kanë kapur mbi 45 gradë në hije, punonjësit e policisë janë të pranishëm çdo ditë në rrugë, duke këshilluar drejtuesit, duke ndëshkuar shkelësit përsëritës dhe mbi të gjitha, duke garantuar sigurinë dhe lëvizjen e lirë të qytetarëve.
Veçanërisht, moshat e treta vlerësojnë ndihmën që u jepet për të kaluar rrugët në zonat e mbingarkuara të trafikut, me prezencë aktive të efektivëve pranë vijave të bardha.
Qytetarët theksojnë se policia në Lushnje nuk shihet si organ gjobëvënës, por si partner i përditshëm, në shërbim të rendit, qetësisë dhe sigurisë rrugore.
Kamera e televizionit Apollon e gazetari Ndriçim Gjoshi ishin sot pranë efektivëve të Policisë së Qarkullimit në Lushnjë, duke ndjekur nga afër një ditë të zakonshme pune në terren. Pamjet e regjistruara tregojnë angazhimin dhe përkushtimin e punonjësve të Policisë për të garantuar sigurinë rrugore dhe për të parandaluar aksidentet.
Gjatë patrullimeve, efektivët u ndaluan pranë mjeteve që kishin shkelje të lehta si mungesa e rripit të sigurimit, përdorimi i telefonit gjatë drejtimit apo parkime të gabuara, duke u dhënë qytetarëve këshilla miqësore dhe paralajmërime edukative, pa aplikuar masa ndëshkuese të menjëhershme.
Drejtuesit e komisariatit shprehen se qëllimi i këtyre ndërhyrjeve është ndërgjegjësimi dhe edukimi i drejtuesve të automjeteve, në mënyrë që të evitohen situatat e rrezikshme dhe të krijohet një kulturë rrugore më e lartë në qytet.
Puna e efektivëve të Policisë së Lushnjës dhe drejtuesve te saje , është një shembull i angazhimit për rend dhe siguri, edhe në temperatura të larta dhe kushte të vështira pune.
Një falënderime të veçanta shkojnë për drejtuesit e komisariatit dhe punonjësit efektivë, të cilët, 24 orë në ditë, 7 ditë të javës, janë në krye të detyrës për qytetarët e këtij qyteti.
