Trajneri Garsia ka vendosur për titullarët në ofensivë, duke u bazuar te forma e mirë e tre sulmuesve kryesorë
Me afrimin e Alesandro Bolzan, repartit ofensiv të Flamurtarit i është shtuar një alternativë e rëndësishme. Megjithatë, trajneri spanjoll Karlos Garsia e ka tashmë të qartë formacionin që do të hedhë në fushë sot në Elbasan, në ndeshjen e parë të kampionatit.
Burime pranë klubit bëjnë me dije se tekniku ka vendosur të mbështetet te treshja sulmuese që e ka bindur plotësisht gjatë përgatitjeve. Ai vlerëson në mënyrë të veçantë nigerianin Krist Evo Ememe, 24-vjeçarin që iu bashkua skuadrës sezonin e kaluar dhe që tashmë ka fituar statusin e titullarit të padiskutueshëm.
Në të njëjtën linjë është edhe Aldrit Oshafi. Sulmuesi shqiptar, që mbërriti në Vlorë në të njëjtën periudhë me Ememe, ka fituar besimin e plotë të Garsias falë paraqitjeve të qëndrueshme dhe disiplinës taktike.
Erald Maksuti, afrimi i këtij sezoni nga Apolonia, është surpriza e këndshme e merkatos. Edhe pse vetëm 21 vjeç, talenti i dalë nga akademia fierake ka treguar se mund të bëjë diferencën dhe trajneri duket i vendosur t’i japë hapësira të rëndësishme që në start.
Si rrjedhojë, formacioni titullar i Flamurtarit për sfidën e sotme në “Elbasan Arena” pritet të ketë në majë të sulmit treshen Ememe – Oshafi – Maksuti. Kjo zgjedhje tregon se Garsia synon të kombinojë shpejtësinë, përvojën dhe energjinë e të rinjve për të nisur kampionatin me një fitore.
Tifozët vlonjatë presin që ky repart të tregojë efikasitet dhe harmoni, duke shpresuar se do të jetë arma kryesore e ekipit në rrugën drejt objektivave sezonalë.
