Irani ngre flamurin simbolik të gjakderdhjes në Xhaminë e Shahit, mesazhi për reagim të fortë pas sulmit izraelit.
Në Xhaminë e Shahit në zemër të Teheranit, autoritetet iraniane kanë ngritur flamurin e kuq, një simbol i rrallë, por jashtëzakonisht domethënës në traditën shiite. Ky flamur lidhet ngushtë me historinë e Imam Huseinit, nipit të Profetit Muhamed, i cili humbi jetën në betejën e Karbalas më 680, duke u shndërruar në një shenjë të martirizimit dhe një thirrje për drejtësi.
Për besimtarët shiitë, flamuri i kuq ngrihet vetëm në raste jashtëzakonisht të veçanta dhe shihet si një paralajmërim i hapur për hakmarrje ndaj padrejtësive të mëdha. Këtë herë, vendosja e tij vjen menjëherë pas sulmeve të Izraelit kundër infrastrukturës bërthamore iraniane, duke ndezur tensionet në gjithë rajonin.
Analistët vlerësojnë se përmes këtij veprimi, udhëheqësit iranianë po dërgojnë një sinjal të qartë kundër Izraelit, duke theksuar gatishmërinë për një përgjigje ushtarake. Ngritja e flamurit është një veprim i rrallë, që nënkupton përgatitjen për ndëshkim.
Udhëheqësi Suprem i Iranit, Ajatollah Ali Khamenei, ka reaguar publikisht ndaj zhvillimeve të fundit, duke paralajmëruar se Izraeli do të presë pasoja të rënda. Ai theksoi se Irani nuk do të lejojë që krimet ndaj vendit të mbeten të pandëshkuara dhe i cilësoi veprimet izraelite si të rënda për të ardhmen e tyre.
Në deklaratën e tij, Khamenei u shpreh i vendosur: “Izraeli duhet të parashikojë një ndëshkim të rëndë! Ata kanë kryer një krim ndaj vendit tonë të dashur dhe ushtria jonë nuk do t’i lërë ata të pandëshkuar”.
Ai shtoi se regjimi zionist me këtë krim “i ka përgatitur vetes një fat të hidhur dhe të dhimbshëm, të cilin patjetër do ta shohë”. Kjo deklaratë u lexua gjerësisht si një paralajmërim serioz për një përgjigje të ashpër nga ana e Iranit.
Veprimi në Xhaminë e Shahit shihet si një hap simbolik, por edhe një nxitje për mobilizim të opinionit publik brenda Iranit dhe përtej tij, duke e vendosur rajonin përpara një situate të paqartë dhe potencialisht të rrezikshme.
