Policia e Tiranës arrestoi një 30-vjeçar finlandez të shpallur në kërkim ndërkombëtar, i cili pritet të ekstradohet për një sërë akuzash të rënda të regjistruara në Finlandën Perëndimore.
Në Tiranë është vënë në pranga një shtetas finlandez i kërkuar nga autoritetet e vendit të tij për disa vepra penale të rënduara. Arrestimi u krye në zonën e Laprakës, pas një operacioni të koordinuar mes strukturave të Policisë së Shtetit dhe Interpol Tiranës, me qëllim ekstradimin e tij drejt Finlandës.
Burime të policisë bëjnë të ditur se falë informacioneve të siguruara nga Seksioni i Kërkimit dhe bashkëpunimit me Sektorin e Krimeve të Rënda dhe Drejtorinë Vendore të Policisë Vlorë, u lokalizua dhe u ndalua shtetasi L. E., 30 vjeç, me origjinë finlandeze.
Ky person rezulton i shpallur në kërkim nga autoritetet e Finlandës Perëndimore, të cilat kishin caktuar ndaj tij masën e sigurisë “Arrest me burg”. Ai akuzohet për disa ngjarje të rënda, ndër to hyrje të paligjshme në banesa private, vjedhje me dhunë, shtrëngim me kërcënim për përfitim pasuror në tentativë dhe heqje të paligjshme të lirisë.
Policia shqiptare nënvizon se kapja e tij u bë e mundur përmes shkëmbimit të vazhdueshëm të të dhënave me Interpol Tiranë dhe bashkëpunimit ndërinstitucional, që çoi në identifikimin dhe neutralizimin e të kërkuarit.
Materialet përkatëse i janë dërguar autoriteteve kompetente për procedurat e mëtejshme ligjore dhe nisjen e procesit të ekstradimit drejt Finlandës, ku ai do të përballet me akuzat që rëndojnë mbi të.
