Finlanda bëhet vendi i parë që kalon nga fjalët në vepra duke përdorur fondet e ngrira ruse për të mbështetur Ukrainën ushtarakisht, në kuadër të sanksioneve të reja europiane ndaj Rusisë.
Finlanda ka marrë një hap historik, duke u bërë shteti i parë në Bashkimin Evropian që vendos të përdorë të ardhurat nga asetet financiare të ngrira ruse për të furnizuar Ukrainën me municione. Ministria Finlandeze e Mbrojtjes njoftoi se 90 milionë euro, të përfituara nga asetet e ngrira, do të shkojnë direkt për të forcuar kapacitetet mbrojtëse të Ukrainës.
Kjo masë përfaqëson një ndryshim të qartë në qasjen evropiane ndaj sanksioneve kundër Rusisë, duke kaluar nga deklaratat te veprimet konkrete. Sipas të dhënave të Bashkimit Evropian, rreth 210 miliardë euro nga një total prej 300 miliardë dollarësh të aseteve të ngrira ruse ndodhen në bllokun e BE-së, kryesisht në formën e obligacioneve shtetërore të mbajtura nga banka qendrore ruse.
Komisioni Evropian ka miratuar që të ardhurat nga këto asete të përdoren për të mbështetur Ukrainën përmes një fondi të posaçëm të menaxhuar nga BE, duke shtuar edhe më shumë presion ndaj Moskës. Ministri finlandez i Mbrojtjes, Antti Hakkanen, deklaroi se falë negociatave të vazhdueshme, është siguruar financim shtesë për ndihmën ushtarake ndaj Kievit.
Në anën tjetër, nga Kremlini ende nuk ka pasur një reagim zyrtar mbi këtë zhvillim. Megjithatë, autoritetet ruse kanë përsëritur shpesh se çdo përpjekje për të konfiskuar apo shitur asetet e ngrira të Rusisë konsiderohet e paligjshme, shkelje e të drejtave të pronësisë dhe një precedent i rrezikshëm që do të kundërshtohet në të gjitha instancat ligjore.
Vendimi i Finlandës shihet si një sinjal i qartë se Europa është e gatshme të shkojë përtej retorikës dhe të përdorë instrumente konkrete për të ndihmuar Ukrainën në përballjen me agresionin rus. Ky hap pritet të nxisë edhe shtete të tjera të ndjekin të njëjtën rrugë në përdorimin e fondeve të ngrira për qëllime mbrojtëse.
Ekspertët vlerësojnë se vendimi i Finlandës jo vetëm që forcon mbështetjen për Ukrainën, por edhe përshpejton diskutimet brenda BE-së për mënyrën e përdorimit të aseteve të ngrira ruse në të ardhmen. Ndërkohë, vëmendja është përqendruar në ndikimet afatgjata që një veprim i tillë mund të ketë për sistemin financiar ndërkombëtar dhe për marrëdhëniet mes BE-së dhe Rusisë.
Ky zhvillim shënon një pikë kthese në politikën e sanksioneve të BE-së, duke treguar se mbështetja për Ukrainën po merr forma gjithnjë e më të prekshme dhe konkrete.
