Fermerët mund të përfitojnë deri në 50% grante dhe të kombinojnë mbështetjen me kredi të buta e garanci sovrane, duke lehtësuar investimet në sektorin bujqësor.
Agjencia për Zhvillimin Bujqësor dhe Rural (AZHBR) ka njoftuar se aplikimet për Skemën Kombëtare të Investimeve në bujqësi do të qëndrojnë të hapura deri më 30 shtator. Fermerët që aplikojnë mund të përfitojnë një grant deri në 50% të vlerës së investimit, i cili arrin deri në 15 milionë lekë për subjekt. Kjo mbështetje financiare mund të kombinohet me kredi të buta dhe garanci sovrane.
Sipas AZHBR, kredia e butë arrin deri në 25 milionë lekë me interes deri në 2%, ndërsa garancia sovrane mbulon deri në 70% të kolateralit. Në këtë mënyrë, fermerët mund të marrin hua me kushte të favorshme për investime në mekanizim, pajisje të reja, sera dhe aktivitete të tjera bujqësore.
Skema e garancisë sovrane është një nismë shtetërore që i garanton bizneset e sektorit bujqësor hua me interes të ulët, ku 70% e shumës garantohet nga shteti. Kjo e bën më të lehtë qasjen në financim, pasi bankat tregtare shpesh kërkojnë garanci të larta që fermerët nuk i zotërojnë.
Për grante, aplikuesit mund të kërkojnë parapagim deri në 30% të shumës së miratuar, pas lidhjes së kontratës me AZHBR, me kusht që të sigurojnë garanci nga kompani sigurimi. Mbështetja përfshin si paketa të plota mekanizimi, ashtu edhe pajisje të veçanta sipas kritereve të përcaktuara.
Skema pranon aplikime nga fermerë individualë, subjekte fizike dhe juridike, si edhe shoqëri të bashkëpunimit bujqësor. Ndër kushtet kryesore për pranimin e aplikimeve janë pronësia ose qiraja afatgjatë mbi tokën apo objektin, mosnisja e investimit para kontratës, përmbushja e detyrimeve tatimore dhe dorëzimi i një plani biznesi për investimet mbi 5 milionë lekë.
Ndryshimet e fundit të miratuara nga Ministria e Bujqësisë kanë shtuar në skemë edhe 9 masa të reja, duke e çuar totalin në 17. Këto masa mbulojnë sektorë si ndërtimi i serrave, mbjelljet frutore, agroturizmi dhe akuakultura, duke ofruar grante që variojnë nga 250 mijë deri në 15 milionë lekë.
Me këto masa të zgjeruara, qeveria synon të rrisë produktivitetin, të nxisë modernizimin e fermave dhe të mbështesë zhvillimin e qëndrueshëm të sektorit bujqësor. Për fermerët, kjo është një mundësi e re për të kombinuar burime financiare dhe për të realizuar projekte që më parë dukeshin të paarritshme.
